Փաստ ինֆո

Երեկ երեկոյան ռուս խաղաղապահների ուղեցկությամբ Գորիսից Ստեփանակերտ ուղևորված 23 քաղաքացիները, հինգ ժամ Շուշի-Քարին Տակ հատվածում սպասելուց հետո, ուշ երեկոյան ստիպված են եղել վերադառնալ Գորիս։ Այդ մասին «Փաստինֆո»-ի հետ զրույցում ասաց Արցախի ՄԻՊ Գեղամ Ստեփանյանը։

«Շուշի-Քարին Տակ հատվածում ադրբեջանցիները կանգնեցրել են մեքենան, քաղաքացիական հագուստով մի ադրբեջանցի մտել է ներս, հաշվել մեքենայում գտնվողներին, պահանջել նրանց անձնագրերն ու ասել, որ մեքենան չի կարող առաջ շարժվել։ Հինգ ժամ այդտեղ կանգնած են մնացել, ու այդ ընթացքում 27 ուղևորներից 4-ի ինքնազգացողություն վատացել է, որոնցից երեքն ուշագնաց են եղել։ Այդ 4 հոգուն շտապօգնության մեքենայով տեղափոխել են Ստեփանակերտի Հանրապետական բժշկական կենտրոն։ Խաղաղապահները մի քանի ժամ բանակցել են ադրբեջանցիների հետ, որ մեքենան կարողանա առաջ շարժվել, բայց արդյունքի չեն հասել ու ստիպված են եղել ժամը 22։30-ի հատվածում մնացած քաղաքացիներին հետ տանել Գորիս»,-մանրամասնեց Արցախի ՄԻՊ-ը՝ հավելելով, որ մեքենայի մեջ եղել են երեխաներ, տարեցներ, մինչև անգամ՝ հաշմանդամություն ունեցող մարդիկ։

Գեղամ Ստեփանյանը նաև նշեց, որ, բացի վերոհիշյալ քաղաքացիներից, ՀՀ-ի տարբեր բնակավայրերում դեռևս հարյուրավոր արցախցիներ են մնում՝ չունենալով տուն վերադառնալու հնարավորություն։

Հարցին՝ ինչպե՞ս է ստացվել, որ քաղաքացիներն Արցախ էին ողւևորվել՝ առանց Կարմիր Խաչի ուղեկցության, Ստեփանյանը պատասխանեց.

«Քիչ, բայց էլի դեպքեր եղել են, որ միայն խաղաղապահների ուղեկցությամբ հաջողվել է ապահովել մարդկանց տեղափոխումն ու ընտանիքների վերամիավորումը։ Իսկ վերջին մեկ ամսում ընդհանրապես հնարավոր չի եղել մարդկանց տեղափոխել. անգամ Կարմիր Խաչի միջոցով դա հնարավոր չէր լինում։ Այս ընթացքում Ադրբեջանի նախագահի խորհրդական Հաջիևի մակարդակով սպառնալիքներ են հնչել նաև Կարմիր Խաչի հասցեին՝ պահանջելով Բաքվի գրասենյակի միջոցով կազմակերպել արցախցիների տեղափոխումը։ 44-օրյա պատերազմից հետո պարբերաբար նաև սպառնացել են, թե փակել կտան Կարմիր Խաչի Ստեփանակերտի գրասենյակը»։

Աղբյուր` Փաստինֆո