Փաստ ինֆո

ՀՀ պաշտպանության նախարարությունն առաջարկում է փոփոխություններ կատարել «ՀՀ ԶՈւ կարգապահական կանոնագիրք» և «Զինվորական ծառայության և զինծառայողի կարգավիճակի մասին» օրենքներում։ Նախատեսվող փոփոխությունների փաթեթն այսօր՝ ապրիլի 4-ին, ՀՀ Ազգային ժողովի պաշտպանության և անվտանգության հարցերի մշտական հանձնաժողովի նիստում ներկայացրեց ՀՀ պաշտպանության փոխնախարար Արման Սարգսյանը։ Հանձնաժողովի ընդդիմադիր անդամները չեն մասնակցում քննարկմանը։

Առաջարկվող փոփոխություններով սահմանվում են վարժական հավաքների և զորահավաքային զինծառայության զորակոչված զինծառայողների նկատմամբ կիրառվող խրախուսանքների և կարգապահական տույժերի տեսակները։ Ըստ այդմ՝ նախատեսվում է ամսական պաշտոնային դրույքաչափի իջեցում 5-30 տոկոսի չափով` 1-3 ամիս ժամկետով։ Բացի այդ, կարգապահական իրավախախտումների տեսակները լրացվում են ևս երկու հոդվածով` զինծառայողի կողմից օրենքով սահմանված սահմանափակումները չպահպանելը և գաղտնիության ռեժիմի կանոնները խախտելը։

««Զինվորական ծառայության և զինծառայողի կարգավիճակի մասին» օրենքում զինծառայողների նկատմամբ օրենքով սահմանված սահմանափակումները լրացվում են նաև ծառայության կրման ցանկացած վայրում սմարթֆոն տիպի բջջային հեռախոս օգտագործելու արգելքով, բացառությամբ` պետական լիազոր մարմնի ղեկավարի հրամանով սահմանված դեպքերի։ Սահմանվում են նաև զինվորական համազգեստով հավաքների կամ հանրային բողոքի բնույթ ունեցող այլ միջոցառման մասնակցելու արգելքը, ինչպես նաև անհատական կամ կոլեկտիվ կերպով քաղաքական բնույթի կոչեր հնչեցնելու արգելքը»,–ասաց Սարգսյանը։

Արգելվում է նաև համացանցով, ԶԼՄ–ներով ԶՈւ գործունեության կամ տեղակայման, կամ իր կամ այլ զինծառայողի գտնվելու մասին փաստող տեղեկություններ, տեսանյութեր, լուսանկարներ տարածելն ու քննարկելը, բացառությամբ՝ պաշտոնական բնույթ ունեցող հրապարակումների։ Օրենքով կարգավորվում է նաև զինծառայողի՝ առանց վերադասի իմացության ՀՀ սահմաններից դուրս գալու արգելքը։
Պայմանագրային զինծառայողների համար սահմանվում է սահմանային տարիքը լրանալուց հետո մինչև 10-ը տարի ժամկետով ծառայությունը երկարաձգելու հնարավորություն` մեկական տարով։

Փոփոխություններ են նախատեսվում նաև հետուսումնական պարտադիր զինծառայությունից հրաժարվելու պարագայում։ Սարգսյանի խոսքով՝ նախկին զինծառայողը տույժ չի վճարի, եթե պայմանագրային զինծառայությունից արձակվելուց հետո երեք տարվա ընթացքում նորից դիմի պայմանագրային զինծառայության անցնելու համար։

Ըստ փոխնախարարի՝ պայմանագրային զինծառայողը մինչև պայմանագրի ավարտը եթե ծառայությունն ավարտելու մասին զեկուցագիր ներկայացնի, ապա պետք է հրաժարագին վճարի` վերջին պաշտոնի դրույքաչափի եռապատիկի չափով։

Առաջարկվող փոփոխությունների փաթեթով հստակեցվում են նաև վարժական հավաքներին կանչելու ոչ ենթակա անձանց շրջանակը։ Իսկ խաղաղ ժամանակ միևնույն գործատուից վարժական հավաքների կանչման ենթակա են աշխատակիցների ոչ ավելին, քան հինգ տոկոսը։ Սահմանվում է նաև արձակուրդը չօգտագործած զինվորներին հատուցում տրամադրելու կարգը։

«Վարչական պատասխանատվություն կսահմանվի զինվորական համազգեստի կրման իրավունք չունեցող անձի կողմից այն ապօրինի կերպով կրելու համար։ Ինչպես նաև վարչական պատասխանատվություն է սահմանվում ռազմատրանսպորտային պարտականություն ունեցող մարմինների կողմից տրանսպորտային միջոցները տեխնիկապես սարքին չպահելու համար»,–հավելեց փոխնախարարը։

Սարգսյանն ընդգծեց, որ առաջարկվող փոփոխություններն անհետաձգելի են և պետք է ընդգրկվեն Ազգային ժողովի առաջիկա նիստում քննարկելու համար։

Աղբյուր` Փաստինֆո