Փաստ ինֆո

Ադրբեջանցիները մեր հողում ինժեներական աշխատանքներ են կատարում, մենք էլ՝ նայում ենք։ Այս մասին «Փաստինֆո»-ի հետ զրույցում ասաց ազատամարտիկ, Արավուսի նախկին վարչական ղեկավար, Տեղ համայնքի ավագանու անդամ Արգամ Հովսեփյանը՝ անդրադառնալով Սյունիքի մարզի Տեղ գյուղի հատվածում ադրբեջանական ներխուժմանը։

Նրա խոսքով՝ չնայած վերջին մի քանի օրերին Հայաստանի ռազմաքաղաքական ղեկավարությունը փորձել է բանակցությունների միջոցով համոզել, որ թշնամին գոնե մի քանի հարյուր մետր հետ քաշվի, սակայն բոլոր ջանքերն անարդյունք են անցել։

«Բանակցություններն ի՞նչ արդյունք պիտի տան։ Եթե արդյունք լիներ՝ պիտի հետ գնային, չէ՞։ Ես հիմա դիրքերում եմ, ոնց եկել են, նույն տեղում են։ Գյուղացիների հողերում ինժեներական աշխատանքները շարունակվում են»,- նշեց նա։

Թե ովքե՞ր և ի՞նչ են բանակցում, ազատամարտիկը չգիտի։ Ասում է՝ դա միայն բանակցողները կիմանան։ Հովսեփյանի խոսքով՝ Հայաստանի ինքնիշխան տարածքը զավթած ադրբեջանցիներն արդեն 11-րդ հենակետ են տեղադրել Տեղ գյուղի արտերում ու արոտավայրերում։

Թշնամու հենակետերը բնակավայրից 100-500, իսկ հայկական հենակետերից՝ մի քանի տասնյակ մետր հեռավորության վրա են գտնվում։ Ազատամարտիկը հույս չունի, թե թշնամին, այն էլ այս տեմպով ինժեներական աշխատանքներ անելու պարագայում, բանակցություններով հետ կգնա։

«Ես չեմ կարծում, որ այս հարցը բանակցություններով հնարավոր է լուծել, իմ կարծիքով՝ սրանց պետք է զենքով հետ շպրտել։ Սրանք բանակցություններով հետ գնացողը չեն»,- հավելեց Հովսեփյանը։

Նշենք, որ մարտի 30-ին հայտնի դարձավ, որ ադրբեջանական զինուժը Տեղ գյուղի հատվածում ստրատեգիական բարձունքներ է վերահսկողության տակ վերցրել, իսկ ՀՀ վարչապետ Նիկոլ Փաշինյանը կառավարության նիստում հայտարարեց, որ այն պայմանավորված է Գորիս-Ստեփանակերտ մայրուղու երթուղու փոփոխությամբ և վստահեցրեց, որ հայկական դիրքերի որևէ փոփոխություն տեղի չի ունեցել, այդ ադրբեջանական ԶԼՄ–ներն են փորձում տեղի ունեցածը ներկայացնել որպես «հերթական բլոկբաստեր»։

Ավելի ուշ ՀՀ ԱԱԾ-ն հանդես եկավ հայտարարությամբ, որում նշվում էր, որ ադրբեջանական կողմը կրկին խախտել է պայմանավորվածություններն ու մի քանի կետերում տեղակայվել սահմանից 100-300 մետր ավելի առաջ, իսկ որոշ տեղերում ադրբեջանական կողմը, չսպասելով նախապես պայմանավորված ճշգրտումներին, սկսել է դիրքավորվել և իրականացնել ինժեներական աշխատանքներ:

Աղբյուր` Փաստինֆո