Փաստ ինֆո

Անարգել, առանց որևէ դիմադրության ու բանակցության, ադրբեջանցիներն ու ադրբեջանական տեխնիկան եկել ու ամրապնդվել են Սյունիքի մարզի Տեղ բնակավայրում։ Այս մասին «Փաստինֆո»-ի հետ զրույցում ասաց մահապարտ, ազատամարտիկ Եփրեմ Մարգարյանը։

Նա անձամբ է այցելել Տեղ, տեղում ծանոթացել իրավիճակին։ Ասում է՝ այն, ինչի մասին գրել են լրատվամիջոցները մինչ այս պահը, համապատասխանում է իրականությանը. ադրբեջանական զինուժն անարգել մոտ 300-350 մետր ներխուժել է ՀՀ ինքնիշխան տարածք, վերցրել ստրատեգիական բարձունքներ, որոնք ուղիղ վերահսկողության տակ են պահում Տեղ և Կոռնիձոր բնակավայրերը Բերձորին կապող մայրուղին։

«Մոտ 70 հա հողատարածք են գրավել։ Դրանք մարդկանց մասնավոր արտերն են փաստաթղթով, հիմա ադրբեջանցիները մարդկանց արտերում տեխնիկան մտցրել են ու դիրքեր են սարքում, որոնք նայում են ուղիղ մայր ճանապարհին։ Բանակը ոչ մի կանխարգելիչ գործողության չի դիմել, Տեղի բնակչությունը՝ ևս։ Ունենք այն, ինչ ունենք։ Համաձայնվում ենք ամեն ինչի հետ»,- նշեց նա։

Ազատամարտիկի խոսքով՝ այդ հատվածում երբևէ հայկական զինուժ չի էլ տեղակայվել։ Հատուկ կորպուսն էլ մատը մատին չի խփել։ Ինչո՞ւ ադրբեջանական ներխուժումը չի կանխվել։ Երևի այդպես էր պետք...

Արդյունքում՝ մի քանի օրից Տեղում անզեն աչքով տեսանելի կլինեն հայկական ինքնիշխան տարածքում, բնակավայրին կից հողերում տեղակայված սնկի պես աճող ադրբեջանական դիրքերը։ Ադրբեջանցիները մրջյունի պես են աշխատում...

«Եթե ժամանակին Տեղի զինվորականները, այդ գավառագիտունները, ժամանակին այդ հատվածում մի 2 դիրք դրած լինեին, ադրբեջանցին այսօր առաջ չէր գա։ Նպատակահարմար չեն գտել դիրքավորվել, որ թուրքն այսօր անարգել գա ու հայկական հողերին տիրանա»,- վրդովվում է զինվորականը։

Մարգարյանը ցավով է արձանագրում՝ կատարվածի հետ հաշտ են ոչ միայն երկրի բարձրաստիճան ղեկավարներն ու պաշտպանության նախարարությունը, այլև տեղեցիները, այն մարդիկ, որոնք մի քանի քայլով էլ են մոտեցել ադրբեջանցիներին, ավելի ճիշտ՝ որոնց տներին էլ ավելի է մոտեցել թշնամին։

«Կարևոր չէ, որ թշնամին իրենց տներից մի քանի մետր է հեռու, բնակչության մտածելակերպն ու ամեն ինչ ի նպաստ թշնամու է աշխատում։ 70 հա հող են կորցրել, այդ հողի 1 հա-ն չէին կարող 1 միլիոնով վաճառել, կառավարությունը 1.5 միլիոն փոխհատուցում կտա, կասեն՝ ապրեք, տեսա՞ք՝ ինչ լավ էր։ Մինչև մեր ու Ձեր տներն են գալու։ Սա է մեր իրականությունը»,- ասում է Մարգարյանը։

...Այսպես, թշնամին ամեն օր՝քայլելով, նորանոր բարձունքների է տիրանում, նոր տարածքներ, գյուղեր զավթում, իսկ Հայաստանի քաղաքական վերնախավում ժողովրդավարությունից ու ժողովրդավարական արժեքներից են խոսում, պատերազմը քթների տակ՝ ասֆալտի, ծառերի, լույսերի ու էլի շատ ուրիշ բաների մասին են խոսում, Աժ-ում տեղի ունեցած ծեծկռտուքն են քննարկում...

Ռազմական ոչ մի տերմին չի օգտագործվում...

«Բանակը թողած, պետք է աջակցել «թիթեռնիկների պաշտպանության կոմիտեին»։ Ժողովրդավար ենք, չէ՞։ Կեցցե՜ մեր վարչապետը, ուռա՜, ուռա՜, ուռա՜... Հեսա փողերը կբաժանեն, ամեն ինչ լավ կլինի... Խնդրեմ՝ վայելե՛ք...»,- եզրափակեց մահապարտ-ազատամարտիկը։

Աղբյուր` Փաստինֆո