Փաստ ինֆո

Լաչինի միջանցքը Հայաստանի Հանրապետությանը կապող ճանապարհն ամբողջությամբ պատրաստ է։ Տեղեկությունը «Փաստինֆո»-ի հետ զրույցում հայտնեց Կոռնիձորի վարչական ղեկավար Արշակ Կարապետյանը։

«Կոռնիձորի ճանապարհն ամբողջությամբ երթևեկելի է, մայրուղու առաջին շերտը լրիվ ասֆալտապատ է, երկրորդ շերտն էլ՝ 90 տոկոսով է պատրաստ։ Ցանկացած մեքենայով ազատ կարող են երթևեկել»,- ասաց նա։

Կարապետյանի խոսքով՝ այժմ ընթանում են մոտ 12 կմ-անոց ճանապարհի մայթեզրեր կառուցման աշխատանքները։ Այս պահի դրությամբ 3 շինարարական կազմակերպություններից մեկն է տեղում աշխատում, մյուսների ներգրավման դեպքում հնարավոր կլինի ասֆալտապատման աշխատանքներն ամբողջովին ավարտին հասցնել։

Հիշեցնենք, որ ադրբեջանցիները երեկվանից փակել են Գորիս-Ստեփանակերտ ճանապարհը։ Ադրբեջանական լրատվամիջոցները հայտնում էին նոր բարձունքներ գրավելու մասին։

Կառավարության երեկվա նիստում ՀՀ վարչապետ Նիկոլ Փաշինյանը հայտարարեց, որ 2022 թվականի օգոստոսին Ադրբեջանի և Լեռնային Ղարաբաղի իշխանությունների միջև ձեռք բերված պայմանավորվածության համաձայն` Լաչինի միջանցքի երթուղին փոխվել է, գործարկվել է նոր ճանապարհ։ Ըստ այդմ՝ նախօրեին Հայաստանն ադրբեջանական կողմին հայտնել է, որ պայմանավորվածության համաձայն`

Կոռնիձորի կամրջից հետո ճանապարհը շարունակվելու է միայն Հայաստանի տարածքով և սահմանապահ զորքերն այդ հատվածում ստանձնելու են ՀՀ սահմանի պետական պահպանությունը։

Փաշինյանն ընդգծեց, որ սահմանապահ զորքերը տեղակայվելու են ՀՀ սահմանին, այն նույն դիրքերում, որտեղ մինչ օրս պաշտպանության նախարարության ստորաբաժանումներն էին տեղակայված ։

Նրա խոսքով՝ ադրբեջանական ԶԼՄ–ները փորձում են տեղի ունեցածը ներկայացնել որպես «հերթական բլոկբաստեր», ինչը, առնվազն, կառուցողական չէ։

Փաշինյանը վստահեցրեց, որ հայկական դիրքերի որևէ փոփոխություն տեղի չի ունեցել։ Միակ փոփոխությունն այն է, որ Հայաստանը մտադիր է խնդրո առարկա հատվածի պահպանությունն իրականացնել սահմանապահ զորքերի միջոցով։ Նույն առաջարկով Երևանը դիմել է նաև պաշտոնական Բաքվին։

Աղբյուր` Փաստինֆո