Փաստ ինֆո

Կառավարությունն այսօրվա նիստում հավանություն է տվել գիտական և գիտատեխնիկական գործունեության մասին օրենքի և հարակից օրենքների փոփոխությունների փաթեթին, որով նախատեսվում է հաստատել գիտության ոլորտի ռազմավարությունն ու ֆինանսավորման նոր մեխանիզմները, գիտաշխատողների ատեստավորման նոր կարգն ու մի շարք այլ փոփոխություններ։ 

Նախագծի ներկայացման ժամանակ ԿԳՄՍ նախարար Ժաննա Անդրեասյանը նշեց, որ նախատեսվում է ձևավորել բարձրագույն կրթության և գիտության կոմիտե, որը գործելու է նախարարության ներքո։

«Մարմնի գործառույթների մեջ է մտնելու բարձրագույն կրթության և գիտության համագործակցության ապահովումը։ Նախատեսվող փոփոխություններով, ըստ էության, կրթության ոլորտում ինստիտուցիոնալ բաղադրիչն է ապահովվելու։ Իսկ բարեփոխումների բովանդակային բաղադրիչն իրացվելու է ակադեմիական քաղաքի ձևավորմամբ, որի ուղղությամբ աշխատանքներ են ընթանում. նախատեսում ենք նաև «ակադեմիական քաղաք հիմնադրամ» ստեղծել»,-ասաց նախարարը։

Փոփոխություններից ակնկալվող արդյունքը, ինչպես նշված է հիմնավորման մեջ, հետևյալն է. «Գիտական և գտատեխնիկական գործունեության մասին օրենքում լրացումներ և փոփոխություններ կատարելու մասին», «Բարձրագույն և հետբուհական մասնագիտական կրթության մասին» օրենքում փոփոխություններ կատարելու մասին» և «Պետական կառավարման համակարգի մարմինների մասին օրենքում փոփոխություններ կատարելու մասին» Հայաստանի Հանրապետության օրենքների նախագծերի ընդունումը հնարավոր կդարձնի ոլորտները կանոնակարգող իրավական ակտերի համապատասխանեցումը բարձրագույն կրթության և գիտության զարգացման արդի վիճակին և միջազգային չափանիշներին, կնպաստի այդ ոլորտների առաջընթացին և դինամիկ զարգացմանը:

Գործադիրը նախագիծը ճանաչելով որպես անհետաձգելի՝ այն ուղարկել է ԱԺ։

Աղբյուր` Փաստինֆո