Փաստ ինֆո

ՀՀ զինդատախազի հետ հանդիպման ժամանակ բարձրացվել են վաշտի կացարանի հրդեհի հետեւանքով զոհված զինծառայողների հարազատներին հետաքրքրող բոլոր հարցերը։ Այլ վարկածների գոյությունն այս պահին բացառված չէ, իրականացվում են ստուգողական, քննչական, դատավարական գործողություններ՝ հնարավոր բոլոր վարկածների ուղղությամբ, բայց որևէ արդյունք որևէ վարկածի վերաբերյալ տեղեկություն չի տրամադրվել։ Այս մասին լրագրողների հետ զրույցում ասաց Ազատ գյուղի տարածքում տեղակայված զորամասի ինժեներասակրավորային վաշտի կացարանում հրդեհի հետևանքով 15 զինծառայողի ծնողների ներկայացուցիչ, փաստաբան Նորայր Նորիկյանը՝ ծնողների և զինդատախազի հետ հանդիպումից հետո`նշելով, որ զինվորական դատախազի կողմից չի բացառվել, որ այլ անձանց նկատմամբ նույնպես քրեական հետապնդումներ կիրականացվեն:

«Մեր կողմից հստակ արձանագրվել է, որ տուժող կողմից ակնհայտ անվստահություն կա ՀՀ գործադիր իշխանության, իրավասու մարմինների, դատախազության, վարույթն իրականացնող մարմնի նկատմամբ և այդ կասկածամտությունը պայմանավորված է իրավասու մարմինների հրապարակային գործունեությամբ, ցուցմունքների միջև հակասություններով, որոնք էլ ստեղծել են այս վիճակը։ Մենք պնդել ենք այլ վարկածների հավանականությունը»,- նշեց Նորիկյանը՝ հավելելով, որ բարձրացվել է դիակների դատաբժշկական փորձաքննությունների եզրակացությունների հակասությունը. «Կոնկրետ դրանցից յուրաքանչյուրը որքանով է գտնվում նույնական պատճառահետևանքային կապի մեջ։ Շմոլ գազը հրդեհից առաջ եղել է, թե՝ ոչ, որտեղից է եղել։ հարց է բարձրացվել հնարավոր պետական դավաճանության կամ հակառակորդի կողմից հնարավոր գործողությունների արդյունքում այս ողբերգության իրականացման հնարավորության մասին։ Մենք պատասխան ենք ստացել, որ բոլոր ուղղություններով քննչական գործողություններ են իրականացվում»։

Փաստաբանը հայտնեց, որ դատախազների տրամադրած տեղեկությունների համաձայն՝ Նիկոլ Փաշինյանը դեռևս չի հարցաքննվել գործով։ Ինչ վերաբերում է դեպքի վայրի խախտմանը, ապա փաստացի հաստատվել է, որ վարույթն իրականացնող մարմինը ճիշտ ժամանակին և օրենքով սահմանված կարգով հասանելիություն չի ունեցել դեպքի վայրին, նրանք հասանելիություն են ունեցել, երբ մարմիններն արդեն տարված են եղել։ Ավելին, կասկածներ կան, որ դիերի տեղափոխման ընթացքում որևէ լուսանկարահանում չի իրականացվել և այդ տարակուսանքը չի փարատվել։ Նորիկյանը մտահոգություն հայտնեց առ այն, որ էական հակասությունները վերաբերում են այն մարդկանց հայտարարություններում, որոնք ողջ են մնացել, տեղավորվում են պաշտոնական վարկածի մեջ, հետագայում էական հակասության մեջ են գտնվում։
«Այսինքն՝ նախկինում արված հայտարարությունները կամ որոշակի վարքագծի փոփոխությունները փոխվում են ի օգուտ պաշտոնական վարկածի»,- նշեց Նորիկյանը։
Փաստաբանի դիտարկմամբ՝ ամբողջ շիլաշփոթը և կասկածամտության մթնոլորտը, հանրությանը պարտադրված պաշտոնական վարկածը գալիս է նրանից, որ մարդիկ իրենց լիազորություններից դուրս են եկել և փորձել են հանրային տրամադրություններ գեներացնել։

«Անվստահությունն էլ ավելի խորացավ, երբ նույն օրը լեյտենանտը, ըստ էության, հերքում էր գործադիր իշխանության ղեկավարին։ Թե հետագայում ինչ զարգացումներ են եղել, կառավարությունում արված հայտարարություններում և լեյտենանտի վարքագծի շեղումներն ինչով են պայմանավորված՝ պետք է հասկանալ»,- նշեց փաստաբանը։

Մանրամասները` տեսանյութում:

Աղբյուր` Փաստինֆո