Փաստ ինֆո

Կառավարությունն այսօր հավանություն տվեց «ՀՀ դրոշի մասին» օրենքում փոփոխություն կատարելու մասին օրենքի նախագծին։ Այն, ի տարբերություն գործող օրենքի, տարածվելու է ոչ միայն պետական շենքերի վրա տեղադրված դրոշների վրա, այլև՝ կրթական, մշակութային հաստատությունների և այլ համայնքային շինությունների։

Առաջարկվող նախագծում, որպես ընդհանուր պահանջ, պահպանվելու է հետևյալ դրույթը. «ՀՀ բարձրացված դրոշը պետք է լինի ամբողջական, մաքուր և չգունաթափված, ընդ որում, դրոշի ներքևի մասը պետք է գտնվի գետնից 2,5 մետրից ոչ պակաս բարձրության վրա»։

Արդարադատության նախարար Գրիգոր Մինասյանը նախագիծը ներկայացնելու ժամանակ նշեց՝ բացի «Դրոշի մասին» օրենքից, փոփոխություններ են արվում նաև «Վարչական իրավախախտումների վերաբերյալ ՀՀ օրենքում։

«Վարչական պատասխանատվությունը ներկայիս գործող օրենքով վերաբերում է միայն շենքերի վրա բարձրացված դրոշներին։ Օրինակ` ՀՀ նախագահի նստավայրի, կառավարության, դատարանների, մարզական, մշակութային կազմակերպությունների և այլ օրենքով սահմանված շենքերի վրա և այլն: Իսկ պաշտոնատար անձանց աշխատասենյակներում կամ ՀՀ այլ վայրերում տեղադրված դրոշներին, կամ օրենքով նախատեսված փոխադրամիջոցների վրա ամրացված դրոշներին ներկայացվող պարտադիր պահանջներ նախատեսված չեն և վարչական պատասխանատվության հիմք հանդիսանալ չեն կարող»,- նշեց Մինասյանը։

Նախարարը նաև նշեց, որ դրոշին ներկայացվող պահանջների խախտման համար այսօր նախատեսված 30- 50 հազար դրամ տուգանքները կպահպանվեն միայն ֆիզիկական և իրավաբանական անձանց համար, իսկ պաշտոնատար անձինք կտուգանվեն 50-70 հազար դրամով։

Աղբյուր` Փաստինֆո