Փաստ ինֆո

Հակակոռուպցիոն դատարանում՝ դատավոր Վարդգես Սարգսյանի նախագահությամբ, այսօր կրկին հետաձգվել է Նիկոլ Փաշինյանի դեմ քրեական գործ հարուցելու պահանջով «Ցորի» զորամասի զոհված զինծառայողների ծնողների ներկայացրած բողոքի քննությունը։

Հիշեցնենք, որ Ցորի զորամասի՝ 44-օրյա պատերազմում զոհված և անհետ կորած զինծառայողների ծնողները 2022թ ապրիլի 18-ին հանցագործության մասին հաղորդում են ներկայացրել ՀՀ գլխավոր դատախազություն առ այն, որ Նիկոլ Փաշինյանն է սպանել իրենց որդիներին։ Ծնողները հիմք են ընդունել Նիկոլ Փաշինյանի Ազգային ժողովում հնչեցրած հայտարարությունը՝ «Կարող էինք կանխել պատերազմը, որի արդյունքում կունենայինք նույն վիճակը՝ իհարկե, առանց զոհերի» հայտարարությունը։

ՀՀ գլխավոր դատախազությունը ներկայացված հանցագործության մասին հաղորդումն ուղարկել է Հակակոռուպցիոն կոմիտե՝ Մովսես Հակոբյանի հայտարարությունների հիման վրա հարուցված քրեական գործի շրջանակներում քննության առարկա դարձնելու համար, ինչի հետ համաձայն չեն տուժողները։ Նրանք պահանջում են հաղորդումն առանձին քննության առարկա դարձնել և անհապաղ հարուցել քրեական գործ և, ըստ այդմ, դատարան բողոք են ներկայացրել՝ դատախազության անգործության դեմ։ Նրանք դատական կարգով պահանջում են քրեական գործ հարուցել Նիկոլ Փաշինյանի դեմ։

Բողոքն ի սկզբանե մակագրված է եղել Երևանի ընդհանուր իրավասության դատարանի դատավոր Դավիթ Արղամանյանին, որը ավելի քան վեց ամիս չի քննել այն, իսկ օրենսդրական փոփոխություններով պայմանավորված Արղամանյանը և մինչդատական վարույթի նկատմամբ դատական վերահսկողության, այսպես ասած, «կալանքի» դատարանի դատավորներն ուղարկվեցին կադրերի ռեզերվ։ Արդյունքում գործը վերակամագրվեց և այժմ գտնվում է Հակակոռուպցիոն դատարանի դատավոր Վարդգես Սարգսյանի վարույթում:

«Փաստինֆո»-ի թղթակցի հաղորդմամբ՝ այսօրվա նիստին, որը բավականին կարճ տևեց, բողոքի քննությունը, ըստ էության, չի կատարվել, գործով ներգրավվեց դատախազ Արշակ Մարտիրոսյանը։ Բողոքաբեր կողմը, սակայն, գտնում է, որ ոչ պատշաճ դատախազի մասնակցություն է ապահովվել բողոքի քննությանը, քանի որ վիճարկվում է ոչ թե Մովսես Հակոբյանի հայտարարությունների հիման վրա հարուցված գործով ներկայացված բողոքը, այլ՝ դատախազության անգործությունը՝ ծնողների կողմից ներկայացված հաղորդման վերաբերյալ։

Արշակ Մարտիրոսյանն համաձայնություն չէր՝ նշելով, որ պատշաճ կարգով ներկայացված հաղորդումը կցվել է կոնկրետ քրեական վարույթին, իրականացվում են քննչական և այլ դատավարական գործողություններ, իսկ ինքը հանդիսանում է դատախազական հսկողություն իրականացնող խմբի անդամ։ Նախագահող դատավորը տեղեկացրեց, որ ՔԿ ԶՔԳՎ ՀԿԳ վարչության պետ Ռաֆայել Վարդանյանի կողմից գրություն է ստացվել, որով դատարանին են ներկայացվել բողոքի վերաբերյալ նյութերը՝ 20 թերթ։ Բողոքի քննությունը հետաձգվեց՝ ապրիլի 17-ն, ժամը՝ 09.30-ն։ Դատական նիստի ավարտից հետո լրագրողների հետ զրույցում զոհված զինծառայողների ծնողների ներկայացուցիչ, փաստաբան Լիպարիտ Սիմոնյանը նշեց, որ հաղորդումը միացվել է մի գործի այն դեպքում, երբ այն որևէ կապ չուներ գործի հետ, նա արձանագրեց առանձին քրեական վարույթ նախաձեռնելու, Նիկոլ Փաշինյանին հարցաքննելու անհրաժեշտության մասին։

Մանրամասները՝ տեսանյութում

Հեղինակ՝ Իզաբել Սահակյան

Աղբյուր` Փաստինֆո