Փաստ ինֆո

ԲԴԽ նախկին նախագահ Ռուբեն Վարդազարյանի և ԲԴԽ նախագահի նախկին պաշտոնակատար, ՀՀ նախկին զինդատախազ Գագիկ Ջհանգիրյանի խոսակցության ձայնագրության հիման վրա նախաձեռնված վարույթը նորից քննելու փոխարեն Հակակոռուպցիոն կոմիտեն երեք ամիս պահել է այն և կարճել։

Հակակոռուպցիոն կոմիտեից «Փաստինֆո»-ի հարցմանն ի պատասխան հաստատեցին, որ վարույթը կարճվել է։ ՀԿԿ փոխանցմամբ՝ քրեական վարույթը կարճվել է ՀՀ քրեական դատավարության օրենսգրքի 13-րդ հոդվածի 1-ին մասի 1-ին կետի հիմքով, այն է՝ հաստատվել է քրեական օրենսգրքով նախատեսված որևէ հանցանքի բացակայությունը։

Հիշեցնենք, որ 2022թ. հունիսի 20-ին Ռուբեն Վարդազարյանը հրավիրած ասուլիսում աղմկահարույց ձայնագրություն էր հրապարակել, որով հիմնավորվում էր, որ ԲԴԽ նախագահի պաշտոնակատար Գագիկ Ջհանգիրյանը փորձել է պարտադրել Վարդազարյանին՝ հրաժարական տալ։ Աղմկոտ զրույց-պահանջը տեղի է ունեցել ընթրիքի սեղանի շուրջ, որին ներկա են եղել ոչ միայն Վարդազարյանն ու Ջհանգիրյանը, այլ նաեւ ԲԴԽ անդամ Ստեփան Միքայելյանը։ Հրապարակված ձայնագրությունից հետեւում էր, որ Վարդազարյանին վարչապետի անունից առաջարկվել է հրաժարական տալ, իսկ Ջհանգիրյանն էլ ստանձնել է միջնորդի դեր՝ երաշխավորելով, որ նրա նկատմամբ հետապնդումներ չեն իրականացվի, եթե հրաժարական ներկայացնի։ Ջհանգիրյանը հանրայինի եթերում անձամբ խոստովանել է, որ բանակցություններ իսկապես վարել է Վարդազարյանի հետ՝ հրաժարական տալու համար։

Ավելին, հայտարարել է, ԲԴԽ նախագահին հրաժարական պարտադրելն այնքան էլ հեշտ գործ չէ ու ինքը նրա նկատմամբ հոգեբանական հնարքներ է կիրառել, «կուտ» տվել։ Աղմկահարույց ձայնագրությունից և առավել անհասկանալի հարցազրույցից օրեր անց հայտարարվեց, թե Գագիկ Ջհանգիրյանն ունի առողջական խնդիրներ և ենթարկվել վիրահատության։ Ակնառու էր, որ Ջհանգիրյանը առողջական խնդիրների քողի ներքո պատրաստվում է հրաժարական տալ, իսկ հուլիսի 1-ին արդեն պաշտոնապես հաստատվեց՝ Ջհանգիրյանը հրաժարականի դիմում է ներկայացրել։ ՀՀ քննչական կոմիտեում նշված ձայնագրության կապակցությամբ նախապատրաստված նյութերով նախաձեռնվել էր քրեական վարույթ, որը դեկտեմբերին կարճվել է՝ հանցանքի բացակայության հիմքով։

ՔԿ-ում վկայի կարգավիճակով վարույթի շրջանակներում հարցաքննվել են նաև ԲԴԽ արդեն նախկին անդամ Ստեփան Միքայելյանը, ինչպես նաև ԲԴԽ անդամներ Սերգեյ Չիչոյանը և Վիգեն Քոչարյանը: Ընդ որում` վերջին երկուսի նկատմամբ քրեական հետապնդում չհարուցելու որոշում էր կայացվել: Նշված որոշման դեմ Վարդազարյանը բողոք էր ներկայացրել, սակայն, մինչ բողոքը կստացվեր, ՀՀ գլխավոր դատախազի տեղակալ Արթուր Պողոսյանը սեփական նախաձենությամբ վերացրել էր քննիչի որոշումը՝ ըստ քննչական ենթակայության գործը Հակակոռուպցիոն կոմիտե ուղարկելու որոշում կայացնելով։ Միևնույն ժամանակ դատախազն արձանագրել է, որ նախաքննության ավարտ հայտարարելուց հետո ժամկետները չեն պահպանվել, քանի որ ավարտ հայտարարելու մասին տեղեկացնելուց հետո քննիչը ժամանակ չի տրամադրել՝ բողոքարկման համար:

Վարույթը Հակակոռուպցիոն կոմիտե տեղափոխվելուց հետո փաստացի սառեցված վիճակում պահվել է երեք ամիս, ապա՝ կարճվել։ Ընդ որում, ավարտ հայտարարելու որոշման մասին Վարդազարյանի ներկայացուցիչները տեղեկացված չեն եղել։ Փաստաբան Հովհաննես Խուդոյանը «Փաստինֆո»-ի հետ զրույցում հայտնեց, որ կարճան որոշման մասին տեղեկացել է ԶԼՄ-ներից, այսօր պատրաստվում է գրություն ներկայացնել Հակակոռուպցիոն կոմիտե՝ պարզելու, թե արդյո՞ք տեղեկությունը համապատասխանում է իրականությունը և եթե այո, ապա ինչու առ այս պահն իրենք տեղեկացված չեն եղել նախաքննության ավարտի մասին։ Փաստաբանը հայտնեց, որ գործը ՀԿԿ տեղափոխվելուց հետո որևէ ծանուցում՝ Ռուբեն Վարդազարյանին հարցաքննության հրավիրելու վերաբերյալ, չեն ստացել, նրա մասնակցությամբ որևէ գործողություն չի կատարվել։ Ըստ ամենայնի, որևէ գործողություն չի կատարվել նաև Գագիկ Ջհանգիրյանի, գործով անցնող վկաների մասնակցությամբ։ Ընդ որում, սա այն դեպքում, երբ վարույթի քննչական ենթակայության փոփոխությունից հետո ՀԿԿ-ն, փաստաբանի դիտարկմամբ, պետք է նորից քննություն իրականացներ։ Հատկանշական է, որ դատախազությունը ՔԿ քննիչի որոշումը վերացնելիս արձանագրել էր, որ նախաքննության ավարտ հայտարարվելուց հետո ժամկետները չեն պահպանվել, սակայն այս պարագայում Հակակոռուպցիոն կոմիտեն ոչ թե ժամկետ է խախտել, այլ՝ անգամ չի տեղեկացրել, որ նախաքննության ավարտ է հայտարարվել։

Հեղինակ՝ Իզաբել Սահակյան

Աղբյուր` Փաստինֆո