Փաստ ինֆո

Ես ո՛չ ՀՀ քաղաքացիությունից եմ հրաժարվում, ո՛չ իմ անուն-ազգանունից, ո՛չ էլ՝ իմ հայ լինելուց։ Ես հրաժարվում եմ բռնցքամարտում հայկական դրոշը բարձրացնելուց։ Այս մասին «Փաստինֆո»-ի հետ զրույցում ասաց բռնցքամարտիկ Էրիկ Իսրայելյանը, որը 2022 թվականին հաղթող է ճանաչվել Արշխարհի և Եվրոպայի երիտասարդների առաջնություններում։

Էրիկն ասում է՝ 13 տարվա դադարից հետո՝ 2022-ին, Հայաստանի Հանրապետությունը՝ ի դեմս իրեն, երկու առաջնություններում մեդալ է նվաճել, սակայն Հայաստան վերադառնալիս իրեն ըստ արժանավույն չեն դիմավորել. ո՛չ նախարարությունից, ո՛չ էլ բռնցքամարտի ազգային ֆեդերացիայից ՝ Զվարթնոց օդանավակայանում իրեն դիմավորելու չեն գնացել։

Էրիկի հարաբերությունները ֆեդերացիայի և նախարարության հետ ավելի են վատացել, երբ ԿԳՄՍ փոխնախարար Կարեն Գիլոյանը բռնցքամարտիկին խոստացել է բնակարանի ձեռքբերման համար պահանջվող 4.5 միլիոն դրամ կանխավճարը հայթայթել։

«Ասել է՝ համբերի, համբերի, համբերի, իսկ ինչու է ասել համբերի, որպեսզի խոսակցությունները ջրվի, գնա։

«4 ամիս է՝ ինձ ասում էր՝ համբերի։ Կարեն Գիլոյանը եկավ մեր տուն, խոստացավ, որ ԿԳՄՍ-ն ամեն ինչ կանի՝ կդիմի ֆեդրացիայի նախագահին, Գագիկ Ծառուկյանին, Երևանի քաղաքապետարանին, որ պահանջվող գումարը կարողանան հավաքել, բայց երբ եկավ օրը, որ պետք է գումարը տար, խաբեց։ Ես տանտիրոջը 800 դոլար բեհ էի տվել, դա էլ գնաց, կորավ։ Ինձ հետ լավ չեն վարվել, ստել են, ինձ կռիվների մեջ են գցել, իմ տված գումարն ա կորել։ Եթե իրենք այսպես են վարվում՝ ես կգնամ»,- ասաց բռնցքամարտիկը և հավելեց, որ ուզում է հանդիպել ՀՀ վարչապետ Նիկոլ Փաշինյանի հետ ու կատարվածի մասին հայտնել նրան։

Իրավիճակի վերաբերյալ պարզաբանում ստանալու նպատակով կապ հաստատեցինք նաև ԿԳՄՍ փոխնախարար Կարեն Գիլոյանի հետ։ Վերջինս չհերքեց, որ Էրիկի հետ քննարկել են բնակարանի ձեռբերման հարցը։ Գիլոյանը նաև հայտնեց, որ 2022 թվականի դեկտեմբերին պետությունը Էրիկին միանվագ 2.3 միլիոն դրամ է վճարել, 1200 դոլար Օլիմպիական կոմիտեն է տրամադրել, ևս 250.000 դրամ՝ Երևանի քաղաքապետարանը։

«Բացի նշված գումարները «Դինամո» ընկերության նախագահն է 100.000 դրամ տվել, անվանի բռնցքամարտիկներն են իրեն գումար տվել, այս տարվա հունվարից ամսական 440.000 դրամ աշխատավարձ էր ստանում պետությունից, 200.000 դրամ էլ՝ Օլիմպիական կոմիտեից։ Դա, որ բազմապատկենք 3 ամսով, ստացվում է՝ 1 միլիոն 920.000 դրամ, այս երկու թվերը, որ գումարենք, կստանանք 4 միլիոն 970.000 դրամ։ Այսինքն՝ ինքը կարող էր չէ՞ կանխավճարը՝ 4.5 միլիոն դրամը վճարել»,- ասաց Գիլոյանը՝ նշելով, որ այսօր պետությունը սպորտին ու մարզիկներին այնպիսի օժանդակություն է ցուցաբերում, որ երբևէ նման օժանդակություն չի եղել։ Նրա խոսքով՝ մեծահասակ մարզիկներ կան, որոնք մինչև 1.4 միլիոն դրամ աշխատավարձ են ստանում։

Աղբյուր` Փաստինֆո