Փաստ ինֆո

ՀՀ Հաշվեքննիչ պալատի նախկին նախկին նախագահ, ԱԺ պատգամավոր Իշխան Զաքարյանը շարունակում է մնալ մեղադրյալի կարգավիճակում, նրա նկատմամբ քրեական հետապնդումը դադարեցված չէ։

Իշխան Զաքարյանի նկատմամբ քրեական հետապնդման մասին «Փաստինֆո»-ն տեղեկացրել էր դեռևս 2021թ., երբ հայտնի դարձավ Իշխան Զաքարյանի՝ «ճամբարափոխ» լինելու մասին։

Դատախազությունից մեր հարցմանն ի պատասխան հաստատել էին քրեական հետապնդման փաստը՝ հայտնելով, որ ՀՀ ԱԱԾ տնտեսական անվտանգության և կոռուպցիայի հակազդման դեպարտամենտում Իշխան Զաքարյանի և մյուսների վերաբերյալ նախապատրաստված նյութերը 2020թ սեպտեմբերի 17-ին ուղարկվել են ՀՀ ԱԱԾ քննչական դեպարտամենտ, որտեղ 2020թ սեպտեմբերի 23-ին ՀՀ քրեական օրենսգրքի 190-րդ հոդվածի 3-րդ մասի 1-ին և 3-րդ կետերով (առանձնապես խոշոր չափերով փողերի լվացումը, որն իրականացվել է պաշտոնեական դիրքն օգտագործելով ), 308-րդ հոդվածի 2-րդ մասով (պաշտոնեական լիազորությունները չարաշահելը, որն առաջացրել է ծանր հետևանքներ), 310.1-րդ հոդվածի 1-ին մասով (ապօրինի հարստացում), 314-րդ հոդվածի 1-ին մասով (պաշտոնեական կեղծիք ) և 314.3-րդ հոդվածի 2-րդ մասով (հայտարարագրերում կեղծ տվյալներ ներկայացնելը) հարուցվել է քրեական գործ։ Նշված քրեական գործով նախաքննությամբ ձեռք բերված՝ հանցանքի կատարումը վկայող բավարար ապացույցների համակցության հիման վրա Իշխան Զաքարյանին մեղադրանք է առաջադրվել ՀՀ քրեական օրենսգրքի 38-308-րդ հոդվածի 1-ին մասով և 314-րդ հոդվածի 1-ին մասով, Զաքարյանի նկատմամբ որպես խափանման միջոց է ընտրվել չհեռանալու մասին ստորագրությունը։ Քրեական վարույթի շրջանակներում կալանք էր դրվել Զաքարյանի գույքի վրա։

Քրեական գործի հարուցումից ավելի քան երկու տարի անց «Փաստինֆո»-ն գրավոր հարցում է ուղարկել ՀՀ գլխավոր դատախազություն՝ պարզելու, թե ի վերջո, ինչ փուլում է գտնվում գործի քննությունը, արդյո՞ք Զաքարյանի մեղադրանքը համապատասխանեցվել է ՀՀ քրեական գործող օրենսգրքին, արդյո՞ք գործի վարույթը կարճելու որոշում արդեն կայացվել է, թե՝ ոչ։ Կառույցից մեր հարցմանն ի պատասխան հայտնել են, որ Իշխան Զաքարյանի և մյուսների վերաբերյալ ԱԱԾ-ում քննվող քրեական քրեական վարույթի նախաքննությունը շարունակվում է, որի շրջանակներում կատարվում են վարութային անհրաժեշտ գործողություններ, այդ թվում՝ նշանակվել է փորձաքննություն, որի եզրակացությունը դեռևս չի ստացվել, իսկ թե ինչ եզրակացություն՝ դատախազությունից չեն մանրամասնել։

«Իշխան Զաքարյանին մեղադրանք է ներկայացվել 2003թ ապրիլի 18-ին ընդունված ՀՀ քրեական օրենսգրքի 308-րդ հոդվածի 1-ին մասով, 38-308-րդ հոդվածի 1-ին մասով և 38-314-րդ հոդվածի 1-ին մասով, որոնք համապատասխանում են ՀՀ քրեական օրենսգրքի համապատասխանաբար 441-րդ հոդվածի 1-ին մասին, 46-308-րդ հոդվածի 1-ին մասին, 46-445-րդ հոդվածի 1-ին մասին։ Իշխան Զաքարյանի արարքներին վերջնական իրավական գնահատական կտրվի քրեական վարույթի ավարտական փուլում»,- հայտնել են ՀՀ գլխավոր դատախազությունից։

Հեղինակ՝ Իզաբել Սահակյան

Աղբյուր` Փաստինֆո