Փաստ ինֆո

Թշնամին վերջին օրերին սադրիչ գործողություններով ճնշում է գործադրում և՛ Արցախի, և՛ Հայաստանի նկատմամբ՝ փորձելով Արցախին և արցախցիներին ստիպել մեղմացնել իրենց դիրքորոշումը Արցախի «ռեինտեգրացիայի» գործում։ Ասվածի վառ ապացույցը՝ Լիսագորի ուղղությամբ բարձունքի գրավումն ու Արցախի գրունտային ճանապարհի վրա վերահսկողություն սահմանելն ու Արցախից Բաքու պատվիրակություն ուղարկելու առաջարկն է, որոնք արվեցին միաժամանակ։ Այս մասին «Փաստինֆո»-ի եթերում հայտարարեց քաղտեխնոլոգ Վիգեն Հակոբյանը։

Ստեղծված իրավիճակում ճիշտ կլինի, որ Հայաստանի իշխանությունները չխանգարեն ու չվնասեն Արցախին ու թույլ տան, որ Արցախն ինքնուրույն որոշի՝ ի վերջո համամիի՞տ է Հայաստանի իշխանությունների դիրքորոշման հետ, թե այլ, իր ուրույն դիրքորոշումն ունի։ Գլոբալ առումով պարզ է, որ ՀՀ այսօրվա ղեկավարությունը այն քաղաքականությունը որ վարում է բացարձակապես ուղղված չէ Արցախի անվտանգության ամրապնդմանը։

Հակոբյանի դիտարկմամբ՝ ժամանակ առ ժամանակ Արցախից հնչում են բավականին կոշտ հայտարարություններ՝ ինքնորոշման իրավունքի, անկախության թեզերի վերաբերյալ, սակայն պրակտիկ գործողություններում դրանք ոչ միշտ են արտահայտվում։ Մյուս կողմից՝ պարզ է, որ Հայաստանը ձեռքերը լվացել է Արցախից, ինչը Փաշինյանը և իր վաչախումբը չեն էլ թաքցնում՝ Արցախին միայնակ թողնելով Ադրբեջանի հետ։ Այս իրավիճակում, ըստ քաղտեխնոլոգի, Արցախն առնվազն պետք է փորձի ինքնուրույն հարաբերություններն ամրապնդել Ռուսաստանի հետ, որն անկախ իր վարած քաղաքականությունից, շարունակում է գետնի վրա մնալ Արցախի անվտանգության միակ երաշխավորը։

«Արցախը պետք է իր դիրքորոշումը հստակեցնի, Արցախի ղեկավարությունը պետք է հստակ իր դիրքորոշման մասին խոսի, չնայի թե ՀՀ ղեկավարությունն ինչ է ասում և ինչ է անում։ Միայն այդ պարագայում ես կարծում եմ՝ կարող են գտնվել աշխարհաքաղաքական ուժային կամ ռեգիոնալ կենտրոններ, որոնք կփորձեն այդ քաղաքականությանն աջակցել»,- նշեց Հակոբյանը։

Փաշինյանական մանր մանիպուլիացիաների, մարդկանց մոլորեցնելու քաղաքական աղանդի ճյուղավորման, ստրատեգիական հիմնական շեշտադրումների և դրանց հակակշիռների, խաղաղության պայմանագրի, ինչպես նաև ՏԻՄ ընտրությունների ու Երևանի քաղաքապետի ընտրությունների շուրջ զրույցն ամբողջությամբ՝ տեսանյութում։

Աղբյուր` Փաստինֆո