Փաստ ինֆո

Եթե Երևանի քաղաքապետի ժամանակավոր պաշտոնակատար Լևոն Հովհաննիսյանը չի վերադարձել Էստոնիայից, ապա ինչ-որ առումով հասկանալի է, որ այսօրվա գործակարգավարական նիստը վարում էր, քաղաքապետի տեղակալ, «Քաղաքացիական պայմանագիր» կուսակցության քաղաքապետի թեկնածու Տիգրան Ավինյանը։ Այս մասին «Փաստինֆո»-ի հետ զրույցում ասաց Երևանի ավագանու անդամ Իզաբելլա Աբգարյանը։

«Քաղաքապետի պաշտոնակատարը, ավագանու որոշ անդամների հետ, մեկնել է էստոնիա։ Եթե դեռ չի վերադարձել երևի դա է պատճառը, որ Ավինյանն էր վարում նիստը, եթե վերադարձել է, ապա տարօրինակ է, որ Հովհաննիսյանը երկրում է, քաղաքում է, բայց նրա փոխարեն իշխանական թեկնածուն է նիստը վարում»,- նշեց Աբգարյանը։

Մինչդեռ նշենք, որ Տիգրան Ավինյանը ոչ թե պաշտոնակատարի բացակայությամբ պատճառաբանեց՝ նիստը վարելը, այլ նշեց, թե տեղակալների միջեւ աշխատանքի բաժանում է արվել ու գործակարգավարական նիստերը հիմնականում վարելու է ինքը։
Տիկին Աբգարյանի խոսքով՝ քաղաքապետի տեղակալներից յուրաքանչյուրը ղեկավարում է տարբեր հարցերով մասնագիտացված ոլորտ, հետևաբար, կոնկրետ ոլորտներ համակարգող մարդն ի պաշտոնե չի կարող վարել գործակարգավարական նիստ, որտեղ քննարկվում են բոլոր ոլորտներին վերաբերող հարցեր։

«Թե ինչու է հենց Ավինյանը վարել նիստը՝ փոքր-ինչ վիճահարույց է։ Նույն հաջողությամբ այն կարող էր վարել մյուս տեղակալներից մեկը։

Թեպետ, կարծում եմ՝ պատճառը բոլորիս էլ պարզ է՝ ինչո՞ւ»,- շարունակեց Աբգարյանը։

Իսկ քաղաքապետարանի աշխատակազմից պնդում են, թե կանոնակարգ- օրենքը չի արգելում, որ Երևանի քաղաքապետարանի գործակարգավարական նիստերը վարի քաղաքապետի տեղակալներից որևէ մեկը։

«Օրինաչափ էր, աշխատանքային խորհրդակցությունը կարող է նաեւ տեղակալը վարել, որևէ արգելք չկա։ Դա ավագանու նիստ չէ, որ միայն ավագանու անդամ, առաջին տեղակալը վարի»,- «Փաստինֆո»-ի հետ զրույցում ասաց Երեւան քաղաքապետարանի աշխատակազմի Լրատվության վարչության պետի տեղակալ Տարոն Գևորգյանը։ Իսկ մեր այն հարցին, թե արդյոք վերադարձե՞լ է Լևոն Հովհաննիսյանը գործուղումից՝ քաղաքապետարանի ներկայացուցիչը դժվարացավ պատասխանել, տեղյակ չէր։ Խոստացավ պարզել, հետ զանգել։

Նշենք, որ Երևանի նախկին քաղաքապետ Հրաչ Սարգսյանի հրաժարականից հետո այսօրտեղի ունեցած առաջին գործակարգավարական նիստը վարում էր Երևանի փոխքաղաքապետ Տիգրան Ավինյանը ու հանձնարարություններ տալիս տարբեր տեղակալների համակարգման ոլորոտում գտնվող վարչությունների պետերին։

Աղբյուր` Փաստինֆո