Փաստ ինֆո

Երևանի ընդհանուր իրավասության դատարանում՝ դատավոր Ադրինե Ղուկասյանի նախագահությամբ, կայացել է Արթուր Սարգսյանի՝ «Հաց բերող»-ի, գործով ակնհայտ կեղծ բժշկական եզրակացություն տալու վերաբերյալ գործով նախնական դատալսումները։ Մեղադրյալի աթոռին են «Իզմիրլյան» ԲԿ նախկին տնօրեն Արմեն Չարչյանը, փորձագիտական հանձնաժողովի անդամներ Հայկազ Չախոյանը, Կարեն Մխիթարյանը, Արմինե Հարոյանը, Վարդան Խաչիյանը։ Նախնական դատալսումների ժամանակ նախ քննարկման առարկա է դարձվել դատախազին բացարկ հայտնելու, ինչպես նաև՝ նախագահողի ինքնաբացարկի հարցը, ընդդատության հարցը, ինչից հետո դատարանն անցել է մեղադրյալների խափանման միջոցի հարցի քննարկմանը։ Բոլոր մեղադրյալների նկատմամբ որպես խափանման միջոց է ընտրված բացակայելու արգելքը, նրանցից երկուսի՝ Հայկազ Չախոյանի և Կարեն Մխիթարյանի նկատմամբ որպես խափանման միջոց ընտրված է նաև պաշտոնավարման կասեցումը, ինչը փաստաբանները պահանջել են վերացնել ու համապատասխան միջնորդություն ներկայացել դատարան։

Դատարանը բավարարել է մասնակի՝ վերացնելով պաշտոնավարման կասեցումը և նրանց նկատմամբ որպես խափանման միջոց թողնելով միայն բացակայելու արգելքը։ Արմեն Չարչյանի պաշտպան Էրիկ Ալեքսանյանը «Փաստինֆո»-ի հետ զրույցում ասաց, որ հաջորդ դատական նիստին միջնորդություն կներկայացնի՝ Արմեն Չարչյանի նկատմամբ ընտրված խափանման միջոցը՝ բացակայելու արգելքը, վերացնելու մասին։

Խափանման միջոցի հարցի քննարկումից հետո դատարանը կանցնի ապացույցների թույլատրելիության հարցի քննարկմանը։ Հաջորդ դատական նիստը նշանակվել է ապրիլի 19-ին։

Հիշեցնենք, որ Արմեն Չարչյանի նկատմամբ քրեական հետապնդում է իրականացվում՝ ՊՊԾ գործով մեղադրյալ Արթուր Սարգսյանի՝ «Հաց բերողի» գործով ակնհայտ կեղծ բժշկական եզրակացություն տալու համար։ Ըստ իրավապահների՝ Չարչյանը, ներգրավված լինելով «Հաց բերող» Արթուր Սարգսյանի նկատմամբ իրականացվող դատաբժշկական փորձաքննության հանձաժողովի կազմում, կեղծ եզրակացություն է տվել։ Նշված վարույթի շրջանակներում Արմեն Չարչյանից բացի մեղադրյալի կարգավիճակում են հանձնաժողվի կազմում ներգրավված ևս չորս փորձագետներ՝ Հայկազ Չախոյանը, Կարեն Մխիթարյանը, Արմինե Հարոյանը, Վարդան Խաչիյանը։ Բոլոր մեղադրյալների նկատմամբ որպես խափանման միջոց է կիրառվել բացակայելու արգելքը։

Նշենք, որ ՊՊԾ գործով մեղադրյալ Արթուր Սարգսյանը մահացել է 2017 թվականի մարտի 16-ին: Քննչական կոմիտեում հարուցվել էր քրեական գործ` ՀՀ քրեական օրենսգրքի 130-րդ հոդվածի 2-րդ մասով, այն է՝ բժշկական օգնություն ու սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահը: Քրեական գործով նշանակել էր հանձնաժողովային դատաբժշկական փորձաքննություն` մահվան պատճառը պարզելու համար: 2018 թվականի ամռանը քննչական կոմիտեն հայտարարեց, որ Արթուր Սարգսյանի մահը վրա է հասել բազմաօրգանային անբավարարությունից:

Բացի այդ, պարզվել էր, որ նա տառապել է «Բեխտերեւի» հիվանդությամբ, սակայն թիվ 226/հձ եզրակացության համաձայն՝ ինչպես «Նուբարաշեն», այնպես էլ «Դատապարտյալների հիվանդանոց» քրեակատարողական հիմնարկներում նշված հիվանդության, ինչպես քրոնիկական սիրտ-թոքային ախտաբանության կապակցությամբ բուժում չի իրականացվել: Սարգսյանի մահվան հանգամանքները չէին բացահայտվել անգամ 2018թ իշխանափոխությունից հետ, այս տարիներին որևէ անձի մեղադրանք չէր առաջադրվել, փոխարենը նրա մահը շարունակում էր շահարկման առարկա դարձվել գործող իշխանությունների կողմից՝ սլաքներն ուղղելով դեպի նախկին իշխանությունները։ Այժմ, երբ Արթուր Սարգսյանի մահվանից շուրջ վեց տարի է անցել, իրավապահները մեղադրում են այն ժամանակ Սարգսյանի առողջական վիճակը և կալանքի հետ հնարավոր անհամատեղելիությունը պարզելու նպատակով նրա նկատմամբ նշանակված դատաբժշկական փորձաքննության հանձնաժողովի կազմում ներգրավված Արմեն Չարչյանին և փորձագետներին՝ բժշկական կեղծ եզրակացություն տալու համար։

Ընդ որում, պարզ չէ, թե ինչ կարգավիճակ ունեն Արթուր Սարգսյանի գործը քննող քննիչները և հսկողություն իրականացնող դատախազը, նախկին գլխավոր դատախազ Արթուր Դավթյանը, քանի որ, եթե անգամ համարենք, որ դատաբժշկական հանձնաժողովային կրկնակի փորձաքննության եզրակացությունը լիարժեք ճշգրիտ չէ, ապա այդ հարցում եւս մեծ դեր է ունեցել ոչ թե հանձնաժողովի անդամների, այլ՝ իրավապահների գործողությունները, ինչ այս պարագայում դրսեւորվել է անգործությամբ։ Մասնավորապես, Արթուր Սարգսյանի նկատմամբ իրականացրած կրկնակի փորձաքննության հանձնաժողովի անդամները պահանջել են լրացուցիչ ելակետային տվյալներ սպառիչ եզրակացություն տալու համար, որը քննիչը չի փոխանցել, ինչի արդյունքում էլ հանձնաժողովը եզրակացություն է տվել, որ առկա տվյալների պարագայում չի կարելի հաստատապես պնդել այն նախկին եզրակացությունը, ըստ որի` Արթուր Սարգսյանը տառապել է բեխտիերևյան կայուն հիվանդությամբ։ Հենց այս եզրակացությունից հետո էլ նախկին գլխավոր դատախազ Արթուր Դավթյանը կալանքի միջնորդությամբ հապճեպ դիմել է դատարան՝ հասնելով կալանքի։ Դատարանի որոշումից հետո կալանավորը հացադուլ է հայտարարել և 10 օր անց մահացել՝ բոլորովին այլ հիվանդությունից։ Ըստ այդմ, որևէ պատճառահետևանքային կապ այդ եզրակացության և մահվան միջև առկա չէ։

Հեղինակ՝ Իզաբել Սահակյան

Աղբյուր` Փաստինֆո