Փաստ ինֆո

44- օրյա պատերազմում զոհված զինծառայողների ծնողներին «Եռաբլուր» զինվորական պանթեոնից ուժի կիրառմամբ բերման ենթարկելու վերաբերյալ քրեական վարույթը տևական ժամանակ է, ինչ «մահացած» վիճակում է։ Այս մասին «Փաստինֆո»-ի հետ զրույցում հայտնեց փաստաբան Վահան Հովհաննիսյանը։

Հիշեցնենք, որ 2022թ. սեպտեմբերի 21-ին՝ ՀՀ Անկախության օրը՝ վաղ առավոտյան ոստիկանության ծառայողներն անհամաչափ բռնի ուժի գործադրմամբ «Եռաբլուր»-ից բերման են ենթարկել 37 քաղաքացու՝ զոհված զինծառայողների ծնողներին, որոնք ցանկանում էին թույլ չտալ Նիկոլ Փաշինյանին՝ մուտք գործել պանթեոն՝ նշելով, որ նա իրենց որդիների մահվան մեղավորը։ Ոստիկանությունից հայտնել են, որ նրանք բերման են ենթարկվել՝ Վարչական իրավախախտումների վերաբերյալ օրենսգրքի 182-րդ հոդվածի հիմքով՝ ոստիկանների օրինական պահանջը չկատարելու համար, թեեւ տեսանյութերում պարզ երեւում է, որ ոստիկանները որեւէ պահանջ չեն ներկայացրել, նախ ուժի գործադրմամբ բերման են ենթարկել հայրերին, ապա նաեւ՝ մայրերին։ Ոստիկանների գործողությունների հետևանքով զոհված զինծառայողների մայրերից մի քանիսը ստացել են տարբեր աստիճանի մարմնական վնասվածքներ, որը հետագայում հաստատվել է նաև դատաբժշկական փորձաքննության եզրակացությամբ։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 441-րդ հոդվածի 2-րդ մասի 1-ին կետի հատկանիշներով, այն է՝ պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը, որը կատարվել է բռնություն գործադրելով։

Թեև տուժող կողմի դիտարկմամբ՝ բավարար տվյալներ արդեն ձեռք են բերվել ոստիկանության ծառայողներին մեղադրանք ներկայացնելու համար, ավելին, ծնողների նկատմամբ բռնությունն արձանագրվել է նաև տեսախցիկներով, իսկ ոստիկանների՝ ոչ իրավաչափ գործողությունների մասին վկայում են նաև վարչական վարույթներով կայացված դատական ակտերը, որով արձանագրված է, որ ծնողներին բերման ենթարկելուց առաջ ոստիկանների կողմից որևէ օրինական պահանջ չի ներկայացվել, այդուհանդերձ, առ այս պահը որևէ ոստիկանի մեղադրանք ներկայացված չէ։

Փաստաբան Վահան Հովհաննիսյանը «Փաստինֆո»-ի հետ զրույցում հայտնեց, որ այս ընթացքում ընդհանրապես որևէ գործողություն չի կատարվել. «Գործը «մահացել» է՝ ըստ երևույթին»։ Նշենք, որ ծնողների և ոստիկանության ծառայողների մասնակցությամբ առերես հարցաքննություններ են եղել, որոնք այժմ, տևական ժամանակ է, չեն շարունակվում։ Աելի վաղ զոհված զինծառայողների ծնողները նշել են, որ հակասությունները առկա են ոչ թե իրենց և ոստիկանների, այլ՝ հենց ոստիկանության ծառայողների ցուցմունքների միջև, ըստ այդմ, պետք է առերեսումներ իրականացվեն հենց իրենց միջև, այլ ոչ թե՝ ծնողների մասնակցությամբ։

Հեղինակ՝ Իզաբել Սահակյան

Աղբյուր` Փաստինֆո