Փաստ ինֆո

Արցախից շարունակվում են մտահոգիչ տեղեկություններ ստացվել: Տելեգրամյան աղբյուրի փոխանցմամբ` մարտի 25-ի գիշերը՝ ժամը 22:00-ի սահմաններում, և լույս 26-ի գիշերը՝ ժամը 02:40-ին, Արցախի Թաղավարդ գյուղի երկնքում պտտվում էր հակառակորդի հետախուզական անօդաչու թռչող սարք։

Հիշեցնենք, որ երեկ` մարտի 25-ին, ադրբեջանցիները, ի հեճուկս եռակողմ պայմանավորվածությունների, խախտել են շփման գիծը ու դիրքավորվել Ստեփանակերտ-Ղայբալիշեն-Լիսագոր ճանապարհին հարակից բարձունքներից մեկին` այդպիսով լոկալ հսկողություն սահմանելով նաեւ գրունտային ճանապարհի վրա որի միջոցավ ապահովվում էր Ստեփանակերտի կապը` Արցախի հսկողության տակ գտնվող Շուշիի շրջանի մի քանի գյուղերի հետ: Արդյունքում` Արցախը հայտնվում է տոտալ հսկողության մեջ` մայր Հայաստանի հետ կորցնելով կապը նաեւ գրունտային ճանապարհով:

Փաստենք, որ Ադրբեջանի հերթական սադրանքը տեղի է ունեցել ԱՄՆ պետքարտուղարի հայտարարությունից հետո, թե Հայաստանն ու Ադրբեջանը մոտ են խաղաղության պայմանագրի ստորագրմանը: Ավելին` նաեւ Կոնգրեսի Սենատի արտաքին հարաբերությունների հարցերով հանձնաժողովի լսումների ժամանակ հայտարարել էր, թե Ադրբեջանը շատ երկար սահման ունի Իրանի հետ և այն պետք է պաշտպանել։ Պետքարտուղարությունը 700 հազար ԱՄՆ դոլար էր խնդրել ադրբեջանցի զինվորականների միջազգային զինվորական կրթության և վերապատրաստման համար:

Հաագայի դատարանի որոշումը չկատարելու, Արցախը ապաշրջափակելու այդ թվում ԱՄՆ կոչերը անտեսելու համար Ադրբեջանի նկատմամբ պատժամիջոցներ կիրառելու փոխարեն՝ ԱՄՆ պետքարտուղարը դեռ Ադրբեջանին բանակին օգնելու հարց է բարձրացնում, ինչին հաջորդում է ռազմական էսկալացիա հրահրող Ադրբեջանի հերթական քայլը:

Ավելին` երեկ ադրբեջանական քարոզչամիջոցներից մեկը տեղեկություն էր տարածել, թե Հայաստանի ու Ադրբեջանի արտգործնախարարները հրավիրվել են Վաշինգտոն:
«Փաստինֆո»-ն փորձել էր ԱԳՆ-ից ճշտել տեղեկությունը, սակայն պաշտոնական պատասխան դեռ չի ստացվել:

Նշենք, որ արտգործնախարար Արարատ Միրզոյանը նախորդ տարվա աշխատանքները ԱԺ-ում ներկայացնելիս, հայտարարել էր, որ առաջին կարեւորության հարցերի շուրջ կողմերը դիրքորշումները բավականին հեռու են։

Աղբյուր` Փաստինֆո