Փաստ ինֆո

Վարչապետ Փաշինյանը մշտական կապի մեջ է Ադրբեջանի ղեկավարության հետ, որը շարունակվում է առ այսօր: Այս մասին ուղիղ եթերում ասաց «Քաղաքացիական պայմանագիր» կուսակցության համահիմնադիր Արթուր Համբարձումյանը:

Գործիչը նախ արձանագրեց, որ ունենալ անկախ պետություն, նշանակում է ունենալ այնպիսի դատական համակարգ, որը պետության քաղաքացիների հարցերը կլուծեր ավելի արդար, քան եթե դու լինեիր այլ պետության կազմի մեջ, հիմա մենք ֆորմալ առումով ունենք անկախ պետություն, ՀՀ-ն ունի այլ պետություններից անկախ դատական համակարգ, բայց արդարադատություն չկա, ունենք անկախ պետություն, բայց անվտանգություն չկա, ունենք անկախ պետություն, բայց ՀՀ-ն ղեկավարում են մարդիկ, որոնք բացահայտ ձևով արդեն տարիներ շարունակ իրականացնում են թշնամի հարևան երկրի հրահանգները և չեն էլ թաքցնում դա: Համբարձումյանը հիշեցրեց, որ պատերազմին նախորդող ժամանակաշրջամնում Ալիևը հայտարարել է, որ պայմանավորվածություն է ունեցել Փաշինյանի հետ, որ երկու տարի չի հարձակվի, իսկ Փաշինյանը պետք է պատրաստեր հողերը հանձնելուն, ռեպրեսիաներ պետք է իրականացվեին, այսպես կոչված, «Ղարաբաղյան կլանի» ներկայացուցիչների, նրանց հետ կապ ունեցող մարդկանց նկատմամբ, ինչը փաստացի հաստատել էր Նիկոլ Փաշինյանը, թվում էր՝ հասարակությունը, իրավապահ համակարգը պետք է ըմբոստանար, ինչը տեղի չունեցավ:

«Լուր, որը խոսում էր այն մասին, որ անկախ Հայաստանի ղեկավարն ունեցել է սեպարատ կապ թշնամական պետության ղեկավարի հետ, հետո արդեն պետք է այդ օպերատիվ կապի միջոցով պայմանավորվածություններ ձեռք բերվեին, որ Հայաստանը զորքերը հետ է քաշում Կուբաթլուից, ըստ էության, ադրբեջանական զորքերին մտցնելով Սյունիքի մարզ, հետո պետք է այդ օպերատիվ կապի միջոցով Արցախի բերդերից պետք է ազատ արձակվեին ադրբեջանցի հանցագործները, որոնք դատապարտվել էին խաղաղ բնակչությանը սպանելու համար»,- ասաց Համբարձումյանը՝ հավելելով, որ այդ ամենը, այդ թվում, դրանից առաջ Մանվել Գրիգորյանի, Ռոբերտ Քոչարյանի ձերբակալություններն իրականացվել են օպերատիվ կապի միջոցով:

Համբարձումյանն ընդգծեց, որ Փաշինյանը մշտական կապի մեջ է Ալիևի հետ, այդ պրակտիկան շարունակվում է առ այսօր, ունենք դեպք, որ ձերբակալված է Արցախի ՊԲ նախկին հրամանատար Միքայել Արզումանյանը, որն ունի վաստակ:

«Հարց է առաջանում՝ կարո՞ղ է պատահել, որ այս գեներալի ձերբակալությունն ուղիղ հրահանգ է՝ իջեցված ադրբեջանական ղեկավարությունից;

Բոլոր հիմքերը կան՝ ենթադրելու, որ նրա ձերբակալությունը և հետագայում կալանավորումը նույնպես տեղի է ունեցել օպերատիվ կապի միջոցով, օրերս կալանավորվեց Գրիգորի Խաչատուրովը, կան բոլոր հիմքերը պնդելու համար, որ Խաչատուրովի ձերբակալությունը նույնպես ադրբեջանական ղեկավարության հրահանգն է՝ օպերատիվ կապի միջոցով»,- նշեց նա՝ հավելելով, որ կա երկու պետություն տարածաշրջանում, որոնք առերևույթ գտնվում են թշնամական հարաբերությունների մեջ, բայց այդ պետությունների ղեկավարությունը գտնվում է ինտենսիվ համագործակցության մեջ և այդ ընթացքում հայկական կողմից մատաղ է լինում սերունդ, սպանդի են տանում հայ տղամարդկանց:

Աղբյուր` Փաստինֆո