Փաստ ինֆո

«Կարծում եմ՝ Ամուլսարի ծրագրի հետ կապված տարբեր գործընթացներ են գնում, որոնց մասին կտեղեկանանք հետո։ Այդ մտքին եմ հանգել, քանի որ Ամուլսարի շահագործման վերաբերյալ հուշագիր ստորագրելուց հետո անդրադարձ չեղավ այդ թեմային։ «Փաստինֆո»-ի հետ զրույցում նման տեսակետ հնչեցրեց բնապահպան Ինգա Զարաֆյանը։

«Ամուլսարի ծրագիրը նոր չէ. հարց է, թե ինչու հիմա նորից վերաբացվեց այդ թեման ու վերսկսվեց գործընթացը։ Դրա պատասխանը մենք չունենք, բայց չեմ կարծում, թե այստեղ գումարի հարց կա, և Կառավարությունը դրա համար է համաձայնել սկսել գործընթացը։ Ըստ իս՝ սա գերտերությունների խաղ է, քաղաքական կոմպոնենտը շատ մեծ է այստեղ, և ՀՀ Կառավարության վրա մեծ ճնշում կա։ Մի բան, համենայնդեպս, հստակ է. եթե համաձայնագիր ստորագրվի և հանքը շահագործվի, ապա շատ վատ վիճակում է հայտնվելու հենց ՀՀ Կառավարությունը, որովհետև ինքն է հիմնական պատասխանատուն»,-նշեց Զարաֆյանը։

Բնապահպանը շեշտում է՝ արտասահմանյան երկրների դեսպանատները նույնպես հետաքրքրված են Ամուլսարի ծրագրով, բայց նրանց հուզում է այն հարցը, թե ինչպես է ՀՀ Կառավարությունը գործարքի մեջ մտել Եվրասիական բանկի հետ, որի բաժնետերը ՌԴ կառավարությունն է։

«Արդեն 10 տարի է, որ Ամուլսարի խնդիրը մեր ուշադրության կենտրոնում է։ Ուսումնասիրել ենք «Լիդիան Արմենիա»-ի գործունեությունը, ֆինանսական հնարավորությունները, այն, թե ինչպես է հայտնվել Հայաստանում...Այսինքն՝ կոնկրետ հանքի շահագործման վտանգների հետ կապված ամեն ինչ վաղուց հայտնի է։ Կան հիմնավոր եզրահացություններ առ այն, թե ինչու չի կարելի է շահագործել այն։ Կառավարությունում ևս քաջատեղյակ են ռիսկերին, քանի որ հենց իրենց պատվերով անկախ եզրակացություն է կազմվել Ամուլսարի հետ կապված։ Այսինքն՝ իրենց սեղանին կա հիմնավոր եզրակացություն, որտեղ նշված է, որ կա՛մ գնահատված չեն ռիսկերը, կա՛մ ինչ էլ որ գնահատվել է, կառավարելի չեն։ Փաստացի, բացասական եզրակացություն է տրվել Ամուլսարի ծրագրին»,-շեշտեց բնապահպանը։

Ամուլսարի հանքի շահագործման ռիսկերի, բազմաշերտ վտանգների մասին տարիներ շարունակ բարձրաձայնել են ոչ միայն բնապահպանները։ Զարաֆյանը ևս մեկ անգամ շեշտեց՝ բացի կոնկրետ «Ջերմուկ» բրենդին սպառնացող վնասից, առողջարանային քաղաքից բնակիչների տեղահանվան անհրաժեշտությունից, նաև լրջորեն վտանգվելու է կենսաբազմազանությունը։

«Թթվային ապարների դրենաժ է լինելու, ինչը թունավորելու է ջրային ռեսուրսները, ու խոսքը մի քանի մարզերի ջրային ռեսուրսների մասին է։ Այսինքն՝ անվտանգային լուրջ խնդիրներ են առաջանալու։ Բացի այդ, հանքի շահագործման դեպքում շատ հակասություններ են լինելու մեր օրենսդրության հետ։ Այն հակասում է նաև Հայաստանի ստանձնած միջազգային պարտավորություններին՝ մասնավորապես Բեռնի կոնվենցիային»,-նշեց Ինգա Զարաֆյանը՝ հավելելով, որ խնդիրը զուտ բնապահպանական չի. սերտորեն առնչվում է, նախ և առաջ, մարդու իրավունքներին։

Աղբյուր` Փաստինֆո