Փաստ ինֆո

Որքան մենք շեշտում ենք խաղաղության մասին, ադրբեջանական կողմը մտածում է, որ մենք մուրում ենք այդ խաղաղությունը։ Մեր դիրքորոշումը, կեցվածքը պետք է լինի այնպիսին, որ միջազգային հանրության համար ընկալելի լինի, որ իրոք Հայաստանի ձգտումը խաղաղությունն է, իսկ Ադրբեջանը, օգտվելով այդ դիրքորոշումից, այլ նպատակներ է հետապնդում։ Որքան պասիվ լինենք բանակցային գործընթացում, այդքան Ադրբեջանն ավելի ոգևորված կլինի, որքան ՀՀ իշխանությունները բռնաճնշումներ կգործադրեն ընդդիմադիր գործիչների կամ այլ ուժերի, նախկին զինվորականների նկատմամբ, այդքան ադրբեջանական կողմն ինչ-որ ազդակներ կստանա ու կսկսի առավելապաշտական պահանջներ ներկայացնի։ Այս մասին ԱԺ-ում ԱԳ նախարար Արարատ Միրզոյանի հետ հանդիպման ժամանակ ասաց ԱԺ պատգամավոր Գեղամ Նազարյանը։

«Ես վստահ եմ, որ մեր վիրավոր, վնասված ռազմական ուժերն ի վիճակի են շատ լուրջ խնդիրներ լուծել, եթե հակառակորդը նածխահարձակ լինի, բայց միևնույն ժամանակ, մենք մեր պահանջները պետք է ներկայացնենք, մասնավորապես, հադրութցիների, շուշեցիների, մարտունեցիների և մարտակերտցիների վերադարձն իրենց տուն, որտեղ ապրել են հազարամյակներ շարունակ, պետք է հստակ աշխարհի ցույց տանք, որ Ադրբեջանն այսօր էլ չի թաքցնում, Ալիևն էլ մեզ լավ նվերներ է մատուցում իր իսկ հայտարարություններով, որ նպատակը ոչ թե Արցախին այս կամ այն կարգավիճակ տալն է, այլ՝ ուղղակի տարածքում հայերից ազատվելը»,- նշեց Նազարյանը։

Նրա խոսքով՝ՀՀ-ն այսօր բավականին բարդ և վտանգավոր մարտահրավերերի առջև է կանգնած, մեզնից յուրաքանչյուրը իր գործողությամբ, քայլերով պետք է փորձի փոքր ինչ այդ հարվածները մեղմելու։ Ամենակարևոր գործերից մեկը ՊՆ-ի հետ մեկտեղ ունի նաև ԱԳՆ-ն և պատգամավորը համոզված է, որ ՀՀ դիրքերը բանակցային գործընթացում շատ ավելի ուժեղ կլինեն, շատ ավելի հզոր կլինեն, եթե այդ բանակցային գործընթացի հետ մեկտեղ տեղի ունենան որոշակի անհրաժեշտ քայլեր, որոնք պետք է անեն այլ նախարարություններ։

Աղբյուր` Փաստինֆո