Փաստ ինֆո

102 օր է, ինչ Արցախի բնակչությունը զրկված է Հայաստանի հետ կապի հնարավորությունից։ Թեև այս ողջ ընթացքում քննարկման առարկա է դարձված ճանապարհի արգելափակումը, բայց դա արցախցիների իրավունքների նկատմամբ Ադրբեջանի ոտնձգությունների համակարգային գործողությունների մեջ ընդամենը տարրերից մեկն է կազմում։ Այս մասին տեսակամուրջի ընթացքում ասաց Արցախի պետական նախարար Գուրգեն Ներսիսյանը։

«Իրականում Ադրբեջանը մի քանի նպատակ է հետապնդում՝ տարբեր գործողություններով։ Առաջինը՝ տնտեսական շրջափակում և Արցախի կենսագործունեության բնականոն պայմանների վերացումը։ Դա տեղի է ունենում էներգամատակարարման, գազամատակարարման պարբերաբար դադարեցումների և խափանումների, ներքին և հեռավար կապի միջոցների աշխատանքների համար խոչընդոտներ ստեղծելով, Արցախ ներկրվող ապրանքների մատակարարման դադարեցմամբ, գյուղատնտեսական աշխատանքների աշխատանքի խաղաղ ընթացքին խոչընդոտելով»,- նշեց Ներսիսյանը։

Երկրորդը, ըստ պետնախարարի, ֆիզիկական և հոգեբանական ուժի կիրառումն է, ուժի կիրառման սպառնալիքի ցուցադրումն է։ Մասնավորապես, 2020թ նոյեմբերի 9-ից հետո Ադրբեջանն առ այսօր կիրառում է ռազմական ուժ, ցուցադրում ուժ կիրառելու սպառնալիք, ինչը կատարվում է ոչ միայն կատարվում է փաստացի գործողություններով, այլև՝ զուգորդվում և ուղեկցվում է Ադրբեջանի բարձրագույն ղեկավարության հրապարակային խոսքով։

Ներսիսյանն ընդգծեց, որ Արցախում գյուղատնտեսական աշխատանքներն իրականացվում են շփման գծին մոտ՝ ադրբեջանական ԶՈՒ-երի կողմից մշտապես հնչող կրակոցների ներքո, այդ ընթացքում ունեցել ենք մահվան դեպք, գյուղատնտեսական տեխնիկայի ոչնչացման և վնասման բազմաթիվ դեպքեր, դա շարունակվում է առ այսօր։

Ներսիսյանը հիշեցրեց, որ օրերս ադրբեջանցիները պլանավորված գործողությամբ հարձակվեցին և սպանեցին ոստիկանության երեք ծառայողի, մեկ ծառայողի՝ վիրավորեցին։

«Երրորդ գործողությունը արցախցիներին հոգեբանական ահաբեկչության ենթարկելն է, վախի ու սարսափի մթնոլորտ ստեղծելը, անորոշության վիճակ ստեղծելը: Չորրորդ արարը Արցախի էթնիկ զտումն է, ընդհուպ մինչեւ ցեղասպանություն: Արցախը Ադրբեջանին պետք է առանց հայերի, կամ քիչ թվով հայերով: Դրա համար իրենք գործադրում են բոլոր միջոցները Արցախը հայաթափելու, դատարկելու նպատակով: Այս նպատակի համար Ադրբեջանը ոչինչ չի խնայում»,-ասաց պետնախարարը:

Ներսիսյանի փոխանցմամբ՝ 44-օրյա պատերազմի հետևանքով ադրբեջանցիների կողմից օկուպացված տարածքներից բռնի տեղահանվել է ավելի քան 99.000 քաղաքացի, որից 15.000-ից ավելին ներկայումս բնակվում է Արցախում, հիմա էլ՝ ստիպված առերեսվում է շրջափակման ծանր իրավիճակին։ Գուրգեն Ներսիսյանն ընդգծեց՝ Արցախն այսօր համայն հայության պատիվն ու արժանապատվությունն է, մեր բոլորիս դեմքն է, այո, գուցե հիմա կնճռոտված է, բայց ծնողը մնում է ծնող, պետք է պահապան լինենք մեր մայր հողին։

Մանրամասները՝ տեսանյութում

Աղբյուր` Փաստինֆո