Փաստ ինֆո

Թեև խաղաղության պայամանագրի շուրջ բանակցում են Հայաստանը և Ադրբեջանը, սակայն փաստաթղթում արված յուրաքանչյուր փոփոխություն և առաջարկ համաձայնեցվում է միջազգային գործընկերների՝ ՌԴ-ի, ԱՄՆ-ի, ԵՄ-ի և ԵԱՏՄ Մինսկի խմբի համանախագահների հետ։ Տեղեկությունն այսօր ԱԺ-ում լրագրողների հետ հարցուպատասխանի ժամանակ հայտնեցին ՔՊ-ական պատգամավորներ Արթուր Հովհաննիսյանն ու Արուսյակ Ջուլհակյանը։

Իշխանական պատգամավորներն ասում են՝ ստիպված են այդպես վարվել, քանի որ գործ ունեն ապակառուցողական հարևանի՝ Ադրբեջանի հետ։

«Բացի առաջարկներից մեր միջազգային գործընկերների հետ կոմունիկացնում ենք նաև այդ առաջարկների բացվածքը, թե ինչու ենք դա առաջարկում, ինչու ենք Ադրբեջանի այս կամ այն առաջարկին արձագանքում հետևյալ կերպ։ Մեր ակնկալիքը մեր միջազգային գործընկերներից հենց այն է, որ փորձեն որոշակի քաղաքական ճնշումների միջոցով բալանսի բերել և մի փոքր գոնե կառուցողականության հուն բերել մեր ապակառուցողական հարևանին»,- նշեց Ջուլհակյանը։

ՔՊ խմբակցության քարտուղար Արթուր Հովհաննիսյանը համաձայն չէ լրագրողի այն դիտարկմանը, թե հայ-ադրբեջանական բանակցությունները մտել են փակուղի։ Ասում է՝ որևէ մեկը չի ասել, որ բանակցային հեշտ ճանապարհ ենք անցնելու, այո՛ կան դժվարություններ, բայց պետք է օրնիբուն աշխատել՝ անկախ նրանից մեր այս կամ այն առաջարկը կընդունի Ադրբեջանը, թե ոչ։

«Բավականին բարդ իրավիճակում ենք գտնվում, առհասարակ աշխարհաքաղաքական շատ լուրջ զարգացումներ կան և եթե մենք շարժվենք այն ճանապարհով, որ եթե մեր մեկ առաջարկը մերժվեց և դա փակուղի է և վերջ, մենք երբեք առաջ չենք շարժվի և խաղաղության գործընթացը կձախողենք։ Ունենք իրավիճակ, որ Ադրբեջանը շարունակում է ապակառուցողական քաղաքականությունը, բայց մենք պետք է մեծացնելով ճնշումը Ադրբեջանի ռազմաքաղաքական ղեկավարության վրա, դիվանագիտական խողովակների միջոցով փորձենք առաջ անցնել»,- հավելեց Հովհաննիսյանը։

Աղբյուր` Փաստինֆո