Փաստ ինֆո

Սահմանադրական դատարանի դատավորը թույլ է տվել օրենքի խախտում, բայց քանի որ ՔՊ-ի նշանակած դատավորն է և իրենց սիրելին է, հետևաբար օրենքը կարևոր չէ։ ՔՊ-ն ցույց տվեց, որ որևէ կերպ կապ չունի իրավունքի գերակայության, սահմանադրականության, ժողովրդական արժեքների հետ։ Այս մասին այսօր ԱԺ-ում լրագրողների հետ հարցուպատասխանի ժամանակ ասաց ԱԺ «Հայաստան» խմբակցության քարտուղար Արծվիկ Մինասյանը՝ անդրադառնալով Սահմանադրական դատարանի դատավոր Սեդա Սաֆարյանի լիազորությունները դադարեցնելու հարցով ՍԴ դիմելու նախագծի քվեարկությանը։

«Նույնիսկ խուսափեց ու վախեցավ իր պատգամավորներին թողնել քվեարկության, որովհետև համոզված եմ՝ առնվազն մի քանի հոգի կգտնվեր, որոնք տարբեր հիմնավորումներով կողմ կքվեարկեին այս նախագծին»,- նշեց նա։
«Հայաստան» խմբակցության քարտուղարի կարծիքով՝ իր վարքագծով ՔՊ-ն վնասեց Սեդա Սաֆարյանին որպես մարդու՝ կասկածի մեջ թողնելով մի դատավորի, որը հետագայում պիտի սահմանադրական արդարադատություն իրականացնի, ինչը Սաֆարյանին անընդհատ մղելու է կաշկանդված գործողությունների։

«Իրենք կարող էին կողմ քվեարկել, դիմումը կգնար ՍԴ, դատարանը կկայացներ որոշումը, ընդ որում, այդ որոշումը վերջնական կլիներ և բեկանման ենթակա չէր լինի։ Իրենք շարժվեցին այլ սկզբունքով՝ խոցելի պահելով Սեդա Սաֆարյանին, արհամարհելով սահմանադրական կարգավորումները, թքելով իրավունքի գերակայության և սահմանադրական պահանջների վրա»,- հավելեց Մինասյանը։
Մինասյանն արձանագրեց՝ երբ փաստաբանական հանրույթի ձայնը բարձրացվում է ԱԺ-ում, ակնհայտ է դառնում, թե իշխող քաղաքական ուժն ինչպիսի ատելությամբ է լցված իրավունքների պաշտպանությամբ զբաղվող կազմակերպությունների հանդեպ։
Հիշեցնենք, որ երեկ ՀՀ ԱԺ ՔՊ խմբակցությունը չմասնակցեց «Հայաստան» խմբակցության ներկայացրած՝ Սահմանադրական դատարանի դատավոր Սեդա Սաֆարյանի լիազորությունները դադարեցնելու հարցով ՍԴ դիմելու նախագծի քվեարկությանը։

Ընդդիմադիր խմբակցությունը նախագիծը ներկայացրել էր ԱԺ` փաստաբաններ Արսեն Բաբայանի և Սոս Հակոբյանի դիմումի հիման վրա։
Դիմումի բովանդակությունն այն մասին է, որ ՍԴ դատավոր Սեդա Սաֆարյանը խախտել է դատավորի պաշտոնում ընտրված անձի համար սահմանված անհամատեղելիության պահանջները և զբաղվել է ձեռնարկատիրական գործունեությամբ։
Նշենք, որ 2022 թվականի սեպտեմբերի 15-ին ԱԺ-ն Սեդա Սաֆրայանին ընտրել է ՍԴ դատավոր։Նա պաշտոնը ստանձնել է դեկտեմբերի 10-ին։

Ըստ փաստաբանների՝ ՀՀ արդարադատության նախարարության իրավաբանական անձանց պետական ռեգիստրում Սեդա Սաֆարյանը գրանցվել է 1994 թվականի օգոստոսի 11-ին՝ որպես ԱՁ, և գործել է մինչև 2023 թվականի հունվարի 27-ը։

Աղբյուր` Փաստինֆո