Փաստ ինֆո

Լաչինի միջանցքի ապօրինի շրջափակման 100-րդ օրն Ադրբեջանը նշանավորեց ՀՀ-ից ԼՂ-ին մատակարարվող բնական գազի 13-րդ անջատումով։ Սրան հաջորդեց ԼՂ՝ էթնիկի զտման ենթարկված Թալիշ գյուղում Ադրբեջանի ղեկավարի ունեցած ելույթը, որն այլ կերպ, քան ագրեսիվ, դժվար է որակել։ Այդ մասին Կառավարության նիստի աշխատանքների մեկնարկից առաջ ունեցած իր ելույթում նշեց վարչապետը։

«Թալիշ գյուղում տեղի ունեցածն Ադրբեջանի կողմից էթնիկ զտման և ցեղասպան քաղաքականության հիմնավոր ապացույց է։ 44-օրյա պատերազմի հետևանքով հայաթափված այդ գյուղում հայերին պատկանող տները քանդում է Ադրբեջանը և դրանց փոխարեն կառուցում ադրբեջանցիների համար նախատեսված տներ։ Հինավուրց հայկական կոթողներից Ադրբեջանը ջնջում է հայկական արձանագրությունները և հարցը համարում լուծված։ Այդպես Ադրբեջանը ցույց է տալիս հայերի իրավունքների «ապահովման» իր մոտեցումը»,-շեշտեց Փաշինյանը՝ հավելելով, որ Ադրբեջանի այդ քայլերը հակասում են նոյեմբերի 9-ի հայտարարության դրույթներին, որով, մասնավորապես, ամրագրված է, որ պետք է ապահովվի ներքին տեղահանվածների վերադարձը՝ ՄԱԿ-ի փախստականների հարցերով գլխավոր հանձնակատարի վերահսկողության ներքո։

Փաշինյանը նաև նշեց, որ Ադրբեջանի ղեկավարության այդ գործողություններին հետևել է ԼՂ-ից և հարակից շրջաններից բռնագաղթած մեր հայրենակիցների հայտարարությունը, ովքեր 2020թ. նոյեմբերի 9-ի հայտարարությունը ստորագրած երկրների ղեկավարներից և ՄԱԿ-ի փախստականների հարցերով գլխավոր հանձնակատարից պահանջում են ապահովել ԼՂ և հարակից շրջաններից բռնագաղթած հայերի արժանապատիվ ու ապահով վերադարձը պատմական հողեր։
«Որպես նշված հայտարարության հասցեատերերից մեկը՝ ուզում են հստակ նշել, որ այդ պահանջն արդարացի է, և ՀՀ կառավարությունը բոլոր միոջցները պետք է ձեռնարկի հայտարարության շահառուների իրավունքները պաշտպանելու համար»,-շեշտեց Փաշինյանը։

Աղբյուր` Փաստինֆո