Փաստ ինֆո

Հիստերիա, պետական գաղտնիքի հրապարակում, պետականության հիմքերը խարխլող, սպառնալիքներ ստեղծող հայտարարություններ։ Սրանք են այն հիմնական պատճառները, որի համար ԱԺ ընդդիմադիր «Հայաստան» խմբակցությունը չի մասնակցում ԱԺ կառավարության հետ հարցուպատասխանին։ Այդ մասին այսօր ԱԺ-ում լրագրողների հետ զրույցում ասաց «Հայաստան» խմբակցության քարտուղար Արծվիկ Մինասյանը՝ հակադարձելով իշխանական պատգամավորների այն հայտարարությանը, թե ընդդիմադիրները չեն ցանկանում գալ և իրենց հուզող հարցերն ուղղել ՀՀ վարչապետին, կառավարության մյուս անդամներին։

«Պետք է դաս առնեն, որ կառավարության հետ հարցուպատասխանը դա հարցերին պատասխաններ տալն է, ոչ թե հիստերիկաբար ամեն ինչ բարդել նախկինների վրա՝ և քանի որ ԱԺ ղեկավարությունն էլ իրենցն է՝ չարաշահելով ժամանակը, չարաշահելով ձայնից զրկելու կամ ձայն տալու կանոնները, փորձում են այս գործիքակազմով հանրության մեջ ահաբեկչական միջավայր ստեղծել, որևէ պատասխանատու վարքագիծ իրենց գործողություններում մենք չտեսանք՝ սկսած ոչ վայել պահվածքից, ավարտած երկրի անվտանգությանը սպառնացող հայտարարություններով»,- նշեց նա։

Մինասյանի խոսքով՝ գործող իշխանությունը զուգահեռ փորձում է ամեն գնով սահմանափակել ընդդիմադիրների՝ տեղեկատվություն ստանալու իրավունքները՝ ակնհայտորեն խախտելով օրենսդրական պահանջները և մանիպուլացնոլով հասարակությանը թյուրիմացության մեջ պահել։

«Բազմիցս են եղել դեպքերը, երբ պարզ ասել ենք՝ այս տեղեկատվությունը անհրաժեշտ է, կամ չեն պատասխանել, կամ ասել են պետական գաղտնիք է, հիմա սրանք են խոսում փախնելու մասին, ակնհայտ է չէ, թե ովքեր են այսօր Հայաստանում իշխանության»,- հավելեց Մինասյանը։

Նշենք, որ ՔՊ խմբակցության քարտուղար Արթուր Հովհաննիսյանը՝ խոսելով խաղաղության պայմանագրի նախագծի շուրջ առաջարկությունների մասին, հայտարարել էր, որ խորհրդարանական ընդդիմությունը խուսափում է գնալ և ծանոթանալ բանակցային գործընթացի դրույթներին, քանի որ «փախնում է պատասխանատվությունից»։

Աղբյուր` Փաստինֆո