Փաստ ինֆո

Մի շարք քաղաքացիներ խնդիրներ են ունենում հաշմանդամության կարգի սահմանման համար դիմումները ՀՀ աշխատանքի և սոցիալական հարցերի նախարարություն մուտագրելիս։ e-disability.am հարթակում էլ հնարավոր չի լինում մուտքագրել դիմում, ինչի պատճառով մեծ հերթեր են գոյանում։ Նման ահազանգեր ստանալով մի շարք քաղաքացիներից՝ «Փաստինֆո»-ն նախարարությունից փորձել է պարզել, թե որն է դիմումները չընդունելու պատճառը։

«Փետրվարի 1-ից առաջին անգամ հաշմանդամության խմբի սահմանման համար դիմող քաղաքացիների համար գործում է անձի ֆունկցիոնալության գնահատման համակարգը։ Ըստ այդմ, քաղաքացին նախ պետք է դիմի իր բժշկական օգնություն և սպասարկում իրականացնող կազմակերպություն (պոլիկլինիկա, բուժհաստատություն)՝ ֆունկցիոնալության գնահատման ուղեգրվելու համար։ Այսինքն՝ գործընթացը սկսվում է պոլիկինիկայից կամ բուժսպասարկում իրականացնող հաստատությունից։ Այնուհետև անձը, որի ֆունկցիոնալությունը պետք է գնահատվի, լրացնում է դիմում և ինքնագնահատման թերթիկ (վերջինս անձի կամ ներկայացուցչի կողմից լրացված որոշակի վավերապայմաններով փաստաթուղթ է, որում նկարագրվում են անձի վիճակը և անհրաժեշտ ծառայությունները՝ իր կամ ներկայացուցչի տեսանկյունից)՝ e-disability.am հարթակում (հղումը՝ https://e-disability.am/home )»,-«Փաստինֆո»-ին պարզաբանել է նախարարության մամուլի խոսնակ Զառա Մանուչարյանը՝ հավելելով, որ տեխնիկական խնդիրներ՝ e-disability.am հարթակի հետ կապված, պետք է որ չլինեն, իսկ եթե լինում են նման դեպքեր, ապա քաղաքացին կարող է դիմել նախարարություն՝ խնդրին լուծում տալու համար։

Մանուչարյանը նաև մանրամասնել է, որ ֆունկցիոնալության ուղեգրում նշվում է անձը հաստատող փաստաթղթի սերիան և համարը, հանրային ծառայությունների համարանիշը կամ հանրային ծառայությունների համարանիշ չունենալու վերաբերյալ տեղեկանքը, իսկ դրանց բացակայության դեպքում՝ սոցիալական քարտը կամ Հայաստանի Հանրապետության օրենսդրությամբ սահմանված կարգով տրամադրված՝ սոցիալական քարտ չունենալու մասին տեղեկանքը և այլ տվյալներ։

«Անձի ֆունկցիոնալության գնահատման համար, բացի վերոնշված փաստաթղթերից, անհրաժեշտ է ներկայացնել նաև՝ 1․ առողջական խնդիրը հաստատող բժշկական փաստաթղթերը, ֆունկցիոնալության գնահատման ուղեգիրը, որն ստացվում է Էլեկտրոնային առողջապահության «Արմեդ» համակարգից. 2․ առկայության դեպքում՝ հիվանդությունների, վնասվածքների առաջացման պատճառի վերաբերյալ համապատասխան մարմնի կողմից տրված փաստաթուղթը․ 3․ ըստ անհրաժեշտության կարող են ներկայացվել նաև այլ փաստաթղթեր»,-մանրամասնել է նախարարության ներկայացուցիչը։

«Փաստինֆո»-ի ստացած ահազանգերի համաձայն, քաղաքացիները ստիպված են լինում օրեր անցկացնել մեկ պոլիկլինիկայի, մեկ նախարարության ստորաբաժանումների միջանցքներում՝ հասկանալու համար, թե իրենց օրենքով հասնող հաշմանադամության կարգի սահմանումն ինչու է ձգձգվում. Մի տեղ ասում են, թե պոլիկլինիկան անհրաժեշտ թղթերը թերի է տրամադրել, հետո, թե ամեն ինչ կարգին է, բայց խնդիրը ծրագրային է։ Արդյունքում՝ առողջական խնդիրներ ունեցող անձինք ավելի են կորցնում իրենց առողջությունը՝ պետական մարմինների դռները թակելիս։

Աղբյուր` Փաստինֆո