Փաստ ինֆո

Լաչինի միջանցքի անհապաղ ապաշրջափակման վերաբերյալ Արդարադատության միջազգային դատարանի որոշումը կյանքի կոչելու համար Հայաստանը պետք է դիմի ՄԱԿ-ի Անվտանգության խորհրդին։ Եթե այդ կառույցը ձևական բնույթ չի կրում, ու ՄԱԿ-ի անդամ երկրները՝ հատկապես որոշիչ ձայն ունեցող մշտական ադամները, իրոք, մտահոգված են կառույցի հեղինակության պահպանմամբ, պետք է որ հետևողական լինեն՝ որոշումը կյանքի կոչելու հարցում։ «Փաստինֆո»-ի հետ զրույցում նման տեսակետ հայտնեց Արցախի ԱԺ արտաքին հարաբերությունների մշտական հանձնաժողովի նախագահ Վահրամ Բալայանը։

«Երկրորդ համաշխարհային պատերազմից հետո ստեղծված իրավակարգն արագ տեմպերով հեղինակազրկվում է։ Ճիշտ է՝ պետությունները միշտ են շահերով առաջնորդվել, բայց վերջին շրջանում դա ավելի է ընդգծվել, կարելի է ասել՝ «գազաֆիկացվել»։ Նավթի ու գազի դերը աշխարհակարգում որոշիչ է դարձել՝ հատկապես Ռուսաստանի նկատմամբ տնտեսական պատժամիջոցների կիրառումից հետո։ Մեծ թափ ունեցող երկրները կարճաժամկետ շահերի հետևից են ընկել ու, փաստացի, անտեսում են իրավակարգի հանդեպ մարդկության վստահության՝ հետզհետե խորացում անկումը։ Դա, միանշանակ, լավ տեղ չի տանելու մարդկությանը»,-ասում է Բալայանը՝ հավելելով, որ Ադրբեջանի սանձարձակ պահվածքը պայմանավորված է նաև 2020թ. պատերազմի արդյունքով։

Ագրեսիայի անտեսումն ու անպատժելիության հանգամանքը, մեր զրուցակցի համոզմամբ, նոր ագրեսիաների ու էսկալացիաների համար հիմք են հանդիսացել ու շարունակում են հանդիսանալ։ Արցախը, սակայն, դա միջազգային հանրությանը հասցնելու համար շատ սահմանափակ ռեսուրսներ ունի, իսկ լծակների մասին անգամ խոսք լինել չի կարող։

«Արցախի չճանաչվածությունը շատ է խանգարում ադրբեջանական հացագործությունները միջազգային հանրությանը տեսանելի դարձնելուն։ Մենք հիմնականում Հայ դատի գրասենյակների օգնությամբ ենք ադրբեջանական հացագործությունների մասին տեղեկացնում եվրոպական երկրներին, միջազգային կառույցներին։ Բավականին մեծ աշխատանք է կատարում ՄԻՊ-ը. փաստերով հագեցված զեկույց է ներկայացվել նաև շրջափակման 100 օրվա ամփոփմամբ։ Բոլոր ռեսուրսներն օգտագործում ենք, բայց դրանք շատ քիչ են։ Հայաստանը պետք է աջակցի մեզ՝ որքան հնարավոր է։ Ադրբեջանը ապատեղեկություն տարածելով՝ անընդհատ շեղում է միջազգային հանրության ուշադրությունն Արցախի շուրջ ստեղծված իրավիճակից ու նոր էսկալացիայի համար հող նախապատրաստում՝ ինչպես արեց 2020թ.»,-նշում է Արցախի ԱԺ պատգամավորը։

Չթերագնահատելով Արցախի հետ աշխատող ԵԽ բարեկամական խմբերի ջանքերը՝ ադրբեջանական հանցագործությունները բարձրաձայնելու և կանխելու ուղղությամբ, Բալայանը շեշտում է՝ անտարբերությունը պետք է մի կողմ թողնեն մարդու իրավունքները հարգող, ուժն ու բռնությունը մերժող բոլոր երկրներն ու հորդորներից գործանական քայլերի անցնեն՝ ռեալ զսպող մեխանիզմներ կիրառելով Ադրբեջանի նկատմամբ։

«Որոշակի հաշվարկներով՝ վերջին երեք ամիսների ընթացքում 40000-ից ավել անդրադարձ է եղել Արցախի շրջափակմանը՝ ներառյալ միջազգային մամուլում տեղ գտած հրապարակումները, քաղաքական գործիչների ելույթները։ Բայց, եթե միջազգային իրավակարգը, իրոք, կարևոր է դերակատարում ունեցող երկրների համար, ապա հստակ, հասցեական քայլերի պիտի անցնեն։ Ի վերջո, անխուսափելի է, որ մի օր էլ «այդ ուղտն իրենց դռանն է չոքելու», քանի որ ագրեսորի ախորժակն անպատժելիությունից ավելի է բացվում»,-ասաց Բալայանը՝ հույս հայտնելով, որ նավթագազային գայթակղությունը կհաղթահարեն,այսպես կոչված, հզոր երկրներն ու, ի վերջո, կսթափվեն։

Աղբյուր` Փաստինֆո