Փաստ ինֆո

Ադրբեջանը բոլոր հնարավոր խողովակներով հող է նախապատրաստում Արցախը Հայաստանին կապող գրունտային ճանապարհը ևս շրջափակելու, այնտեղ ևս զինվորական ներկայություն ու հետախուզական խմբեր տեղակայելու համար՝ այդպիսով Արցախն ամբողջությամբ շրջափակման մեջ գցելու նպատակով։ Այս մասին «Փաստինֆո»-ի հետ զրույցում ասաց ռազմական փորձագետ Հայկ Նահապետյանը՝ անդրադառնալով երեկ Ադրբեջանի ԱԳՆ տարածած հաղորդագրությանը, որում նշվում է, թե հայերն այդ ճանապարհով զինտեխնիկա են տեղափոխում Արցախ։

«Իրենց խնդիրն Արցախն ամբողջությամբ շրջափակելն է։ Պատրվակ է՝ իբր Հայաստանից Արցախ զենք, զինամթերք, զինանձնակազմ են տեղափոխում, որևէ ապացույց չկա, բայց իրենք քարոզչական հող են նախապատրաստում, որ այդ ճանապարհը ևս կտրեն։ Նրանց թիվ մեկ խնդիրը Արցախն ամբողջովին Ադրբեջանի մաս դարձնելն է, որ այնտեղ մեր հայրենակիցները չապրեն»,- նշեց նա։

Նպատակին հասնելու համար Ադրբեջանին խոչընդոտում են ռուս խաղաղապահները և դա է պատճառը, որ հաճախ են բողոքում, թե «այդ փոխադրումներն» իրականացվում են ռուս խաղաղապահների ուղեկցությամբ։ Նահապետյանի կարծիքով՝ դրանք մտացածին մեղադրանքներ են, որ հնարավոր ագրեսիայի դեպքում ռուս խաղաղապահների ձեռքերն էլ կապեն, որ վերջիններս չկարողանան իրենց գործառույթներն այս տարածքում իրականացնել։

Ստեղծված աղետալի իրավիճակում, Նահապետյանը միակ լուծումը համարում է Հայաստանում ՀԱՊԿ խաղաղապահ հետ ռազմատեխնիկական համագործակցությունը։

«Հայաստանը պատրաստ չէ ադրբեջանական հնարավոր ագրեսիային և Ադրբեջանի ցանկացած նախահարձակ գործողություն կարող է հաջողությամբ պսակվել։ Աղետի նախաշեմին կա մեկ լուծում՝ ՀԱՊԿ դիտորդներ, անհրաժեշտության դեպքում ՀԱՊԿ խաղաղապահ զորախումբ Հայաստան տեղակայել, ՀԱՊԿ զորավարժություններ կազմակերպել, թվաքանակը կարող է բավականին մեծ լինել այդ զորավարժությունների անցկացման անձնակազմի, ընդ որում բավականին երկար ժամանակ կարող են այստեղ մնալ, որը բնականաբար ինչ-որ տեղ Ալիևի ձեռքերն է կապում»,- հավելեց Նահապետյանը։

Հիշեցնենք, որ երեկ Ադրբեջանի Արտաքին գործերի նախարարությունը հայտարարություն էր տարածել, որում հայկական կողմին մեղադրում էր Հայաստանն Արցախին կապող այլընտրանքային գրունտային ճանապարհով ռազմական փոխադրումներ իրականացնելու համար։

Աղբյուր` Փաստինֆո