Փաստ ինֆո

Մի կողմից ընթանում է բանակցային գործընթաց խաղաղության պայմանագրի շուրջ, մյուս կողմից մենք տեսնում ենք Ադրբեջանի կողմից և՛ ավելի սրվող հռետորաբանություն, և՛ սպառնալիքներ, և ինչպես ասում են՝ գետնի վրա ագրեսիվ գործողություններ։ Այս մասին այսօր ԱԺ-ում հայտարարեց ՀՀ ԱԳ նախարար Արարատ Միրզոյանը՝ պատասխանելով ՔՊ-ական պատգամավոր Սարգիս Խանդանյանի այն դիտարկմանը, որ Ադրբեջանի նախագահ Ալիևը վերջին շրջանում սպառնում է ռազմական ՀՀ ինքնիշխան տարածքում ռազմական գործողություններ իրականացնել։

«Վերջին շրջանում էլ ավելի են սրվել թե՛ հայատյացության քարոզը, թե՛ ուղղակի սպառնալիքները, Ադրբեջանի նախագահն անգամ հայտարարեց, որ խաղաղության պայմանագիր չի լինելու, Հայաստանում 29.800 քառ կմ վրա հանգիստ չեն ապրելու, եթե չընդունեն Ադրբեջանի պայմանները։ Այս ուլտիմատիվ կեցվածքը կա, այս հռետորաբանությունը կա և միևնույն ժամանակ բանակցությունները խաղաղության պայմանագրի շուրջ ընթանում են»,- նշեց Միրզոյանը՝ մեկ անգամ ևս վերահաստատելով ՀՀ վարչապետ Նիկոլ Փաշինյանի ասածները, որ հայկական կողմը ստացել է խաղաղության պայմանագրի նախագծի վերաբերյալ ադրբեջանական վերջին առաջարկները և աշխատում է այդ ուղղությամբ։

Նա վստահեցրեց, որ շուտով պատրաստ կլինեն նաև հայկական կողմի առաջարկները, որոնք պաշտոնական Երևանը կուղարկի Բաքվին։

ՀՀ ԱԳ նախարարի դիտարկմամբ՝ Ալիևի հռետորաբանությունն ու ընդունած կեցվածքը ոչ միայն չի նպաստում խաղաղության գործընթացին, այլև նոր խոչընդոտներ է ստեղծում այդ ճանապարհին։ Չնայած դրան՝ հայկական կողմը հաստատակամ է, չի փոխել իր դիրքորոշումը և շարունակելու է բանակցել՝ նպատակ ունենալով տարածաշրջանում երակարատև և կայուն խաղաղություն հաստատել։
Անդրադառնալով Իլհամ Ալիևի և ԱՄՆ պետքարտուղար Էնթոնի Բլինկենի հեռախոսազրույցին, որի ընթացքում Ադրբեջանի նախագահը կրկին խոսել էր Հայաստանի սահմանին անցակետ տեղադրելու մասին, Միրզոյանն ասաց, որ Հայաստանը չի բանակցում Ադրբեջանի հետ՝ Լաչինի միջանցքում ադրբեջանական անցակետ տեղադրելու շուրջ։

«Հայաստանը համարում է, որ Լաչինի միջանցքի և նրա ռեժիմի շուրջ բանակցությունները վաղուց ավարտվել են և դրա շուրջ կարգավորումները տեղ են գտել 2020 թվականի նոյեմբերի 9-ի եռակողմ հայտարարության մեջ, ըստ որի Լաչինի միջանցքը մնում է ռուսական խաղաղապահ ուժերի վերահսկողության տակ և Ադրբեջանը երաշխավորում է այդ միջանցքով երկկողմ անխափան երթևեկությունը մարդկանց, բեռների և մեքենաների»,- հավելեց ՀՀ ԱԳ նախարարը։

Միրզոյանի կարծիքով՝ Ադրբեջանի այս վարքագիծը ընդհանրապես կասկածի տակ է դնում հետագա բանակցությունների նպատակահարմարությունը, քանի որ իմաստ չունի բանակցել և պայմանավորվածություններ ձեռք բերել այլ հարցերի շուրջ, եթե դրանք որոշ ժամանակ հետո խախտվելու են Ադրբեջանի կողմից և Ադրբեջանը նույն այդ հարցի շուրջ հանդես է գալու նոր, ավելի կոշտ պահանջներով։ Ոչ, մենք չենք բանակցում Լաչինի միջանցքում ադրբեջանական անցակետ դնելու շուրջ։

Աղբյուր` Փաստինֆո