Փաստ ինֆո

«Այս մարդկանց համար մարդկային մահը ոչ թե ողբերգություն է, այլ ընդամենը վիճակագրություն՝ ստալինյան հայտնի տրամաբանության համաձայն»,- «Հայաստանի անվտանգության փլուզված համակարգը» թեմայով քննարման ժամանակ նման դիտարկմամբ է հանդես եկել «Հայրենիք» կուսակցության խոսնակ Սոս Հակոբյանը՝ խոսելով զինված ուժերի, բանակի նկատմամբ իշխանությունների անլուրջ մոտեցման մասին։

Նրա խոսքով՝ երբ տեսնում են, որ սահմանին նկատվում է ադրբեջանական զինուժի կուտակումներ, իշխանությունները հերքում են, մինչդեռ դրան հաջորդում են տարբեր երկրներից զգուշացումներ։
Սոս Հակոբյանի խոսքով՝ ցանկացած գործողություն պետք է դիտարկել, թե արդյոք այդ քայլն օգնե՞ց քո երկրի անվտանգությանը, թե՞ վնասեց:

«Օրինակ, ՀԱՊԿ տեղակալի քարտուղարին երբ հետ ենք կանչում, դա օգնե՞ց, թե՞ վնասեց: Երբ ասում ենք, որ ՀԱՊԿ-ը դուրս է գալիս Հայաստանից՝ օգնում է, թե վնասում է մեր անվտանգությանը։ Ի վերջո, երբ խոսում ենք «Խաղաղության պայմանագրից», հարց է առաջանում՝ ո՞րն է լինելու կյանքը դրա ստորագրումից հետո: Կամ ավելի պարզ, ի՞նչ է գրված այդ «Խաղաղության պայմանագրում» վերջապես»,- ասաց նա։

Նրա արձանագրմամբ՝ նպատակը պետք է լինի ոչ թե որևէ պայմանագրի ստորագրելը, այլ դրա միջոցով տանելի կենսական պայմաններ ստեղծելը, որ վաղն ունենանք հնարավորություն՝ մեր պետության հզորությունը, սուվերենությունը վերականգնելու համար։

«Պայմանագրի ստորագրումից հետո, եթե Արցախում էթնիկ զտումներ սկսվեն՝ ինչ պետք է անի Հայաստանը, հայտարարություններ անի, դատապարտի, թե պետք է թույլ տա, որ ադրբեջնական շարասյունները Հայաստանի տարածքով գնան Նախիջեւան»,- նշել է նա։

Աղբյուր` Փաստինֆո