Փաստ ինֆո

Արցախի Ասկերան քաղաքում ծնված «Նախշուն թեյ»-ն արդեն հասցրել է ճանաչվել մի քանի մայրցամաքներում։ Կորոնավիրուսային համավարակի օրերին Գաբրիելյանները թեյի՝ տատիկից փոխանցված բաղադրատոմսերը որոշեցին հանրայնացնել ու միաժամանակ սեփական բիզնեսը հիմնել։

«Տատիկս խոտաբույսերով թեյեր էր սարքում։ Հիմա ինքը, ցավոք, չկա, բայց նրա բաղադրատոմսերը պահպանվում են։ Որոշեցինք խոտաբույսերով թեյերի արտադրություն հիմնել՝ հիմքում հենց տատիկիս բաղադրատոմսերն ունենալով։ Հիմա վեց տեսակի միքս ունենք, յուրաքանչյուրի մեջ 5-6 խոտաբույս։ Արցախի տարբեր հատվածներից՝ հիմնականում բարձրլեռնային գոտիներից ենք հավաքում խոտաբույսերը։ Նախքան պատերազմը, մեծ մասը Քաշաթաղից ու Քարվաճառից էինք հավաքում, հիմա՝ հազվադեպ հանդիպող մի շարք խոտաբույսեր, օրինակ՝ անթառամը, բերում ենք Ջերմուկից»,- «Փաստինֆո»-ի հետ զրույցում ասաց Դավիթը՝ «Նախշուն թեյ» բրենդի հիմնադիրը։

Գաբրիելյանների՝ միջազգային շուկայի ստանդարտներին համապատասխանող արտադրանքը նախքան շրջափակումը լայն սպառում ուներ արտաքին շուկայում։ Եթե նախկինում ամսական 500-1000 տուփ իրացվում էր միայն դրսում, ապա արդեն երրորդ ամիսն է, որ «Նախշուն թեյ»-ի արտադրանքից ոչ մի տուփ դուրս չի եկել Արցախից։
«Շատ ենք տուժել շրջափակման պատճառով։ Buy Armenia-ում ներկայացված ենք ու շատ պատվերներ ենք ունենում տարբեր երկրներից՝ ԱՄՆ, Բրազիլիա և այլն։ Վերջերս երեք խոշոր պատվեր՝ ամեն մեկը 300-400 տուփ, մերժել ենք, քանի որ հնարավորություն չկա ուղարկելու»,-նշեց Դավիթը։

Գործարարության մեջ բավականին փորձ ունեն արդեն Գաբրիելյանները. ոչ միայն համապատասխան պայմաններով չորանոց են սարքել տան պատշգամբում, այլև սննդի անվտանգության տեսչական մարմնի կողմից թեստավորել են, որպեսզի ամեն ինչ ճիշտ ու օրինական արվի։

Դավիթն ասում է՝ ներկա դրությամբ շուրջ 3000 տուփի չափով պահեստավորած հումք ունեն. մնում է՝ ճանապարհը բացվի, որ փաթեթավորման հարցը կարողանան լուծել ու վերսկսել արտահանումը։

Աղբյուր` Փաստինֆո