Փաստ ինֆո

ՌԴ Իրկուտսկի դատարանը հինգ տարվա խիստ ռեժիմի գաղութում ազատազրկման է դատապարտել տղամարդուն՝ իր կենակցուհու չորսամյա դստերը խոշտանգելու համար, կիրակի հայտնել է Իրկուտսկի շրջանային դատախազությունը Telegram ալիքում:

Իրկուտսկի դատարանը դատավճիռ է կայացրել տեղի 32-ամյա բնակչի նկատմամբ, որը մեղավոր է ճանաչվել անչափահասին խոշտանգելու հոդվածով: Պարզվել է, որ ամբաստանյալը պարբերաբար ծեծի է ենթարկել իր կենակցուհու դստերը, ստիպել կանգնել սիսեռի վրա, ցավ ու հոգեկան տառապանք պատճառել։ Օգնության համար աղջիկը դիմել է տան մոտ գտնվող մթերային խանութ, որտեղ վաճառողը նկարահանել է երեխայի հետ զրույցը եւ ծեծի ակնհայտ հետքերը՝ այն տեղադրելով համացանցում: Դրանից հետո տեղի ունեցածով հետաքրքրվել են դատախազությունը, ոստիկանությունը, խնամակալության եւ հոգաբարձության մարմինները։ Քննչական կոմիտեի քննիչները քրեական գործ են հարուցել։

«Հաշվի առնելով պետական մեղադրողի կարծիքը՝ դատարանը քաղաքացուն նշանակել է 5 տարվա ազատազրկում՝ խիստ ռեժիմի ուղղիչ գաղութում», - ասված է հաղորդագրության մեջ:

Նշվում է, որ երեխան հեռացվել է ընտանիքից և գտնվում է սոցիալական հաստատությունում, քանի որ երեխայի մայրը սահմանափակված է ծնողական իրավունքների հարցում:

Աղբյուր` Փաստինֆո