Փաստ ինֆո

Ո՛չ Ալիևը, ո՛չ Փաշինյանը շահագրգռված չեն խաղաղության պայմանագրի ստորագրմամբ։ Այս մասին «Փաստինֆո»-ի եթերում ասաց քաղաքագետ Սուրեն Սուրենյանցը։

Նրա խոսքով՝ Փաշինյանը շատ լավ է հասկանում, որ ցանկացած փաստաթղթի ստորագրում իր համար կարող է իշխանություն արժենալ, եթե դրան հաջորդեն ներքաղաքական ցնցումները, որովհետև ցանկացած փաստաթուղթ պարտված Հայաստանի համար ցավոտ է լինելու։

«Վստահ եմ, որ Նիկոլ Փաշինյանը ներքաղաքական կոնտեքստին զոհաբերել է կարգավորման գործընթացը, ինքն առաջին հերթին մտածում է՝ չանել մի բան, որը կարող է վտանգել իր իշխանությունը, իսկ Ալիևին խաղաղության պայմանագիրը պետք չէ, որովհետև ինքն անընդհատ կազուս բելլի է փնտրում՝ պատերազմի առիթ, որ իր օրակարգն ու բանակցային դիրքերն ավելի ուժեղացնի»,- նշեց նա։

Սուրենյանցի գնահատմամբ՝ Հայաստանը և Արցախը կանգնած են լրջագույն մարտահրավերների առաջ և անհրաժեշտ է, որ ՀՀ իշխանությունները միաժամանակ աշխատեն բոլոր միջազգային գործընկերների հետ և ոչ թե անհեռատես քաղաքական հայտարարություններ հնչեցնեն ՀԱՊԿ-ից դուրս գալու, ռուսական դաշնակցային պարտավորությունների չկատարելու մասին, կասկածի տակ դնեն Արցախում ռուսական խաղաղապահ առաքելության գործունեությունը։ Այս երկկողմ, բազմակողմ աշխատանքը շատ ավելի իրական և արդյունավետ է, քան դիմել միջազգային գործիքների օգնությանը, որոնք միայն հեքիաթներում կարող են աշխատել։

«Ռուսների հետ պետք է անաղմուկ, առանց փիառվելու արդյունավետ դիվանագիտական աշխատանքի շնորհիվ դրվի հետևյալ հարցը՝ որն է այն կարմիր գիծը, մինչև որտեղ կամ որից այն կողմ ռուսները չեն հանդուրժելու Ադրբեջանի ոտնձգությունները, եվրոպական կամ Արևմտյան գործընկերների առջև պետք է դրվի մեկ այլ խնդիր՝ երբ են պատրաստվում լալահառաչ հայտարարություններից անդին կոնկրետ սանկցիաներ կիրառել Ադրբեջանի դեմ»,- ասաց քաղաքագետը։
Հարցազրույցն ամբողջությամբ՝ տեսանյութում։

Աղբյուր` Փաստինֆո