Փաստ ինֆո

Մարտի 20-ին Մոսկվայում կայանալիք ՀՀ և ՌԴ արտաքին գործերի նախարարների հանդիպումը, ՀԱՊԿ գլխավոր քարտուղարի երկօրյա այցը Հայաստանը վկայում են, որ ամեն ինչ կորած չէ և հայ-ռուսական սրված հարաբերությունները դեռևս հնարավոր է կարգավորել։ «Փաստինֆո»-ի հետ զրույցում նման կարծիք հայտնեց քաղաքագետ Գարիկ Քեռյանը։

«Հայաստանի արտաքին քաղաքական վեկտորի փոփոխությունը նկատվում է, բայց ասել, թե Հայաստանն արդեն լրիվ փոխել է իր արտաքին քաղաքական վեկտորը՝ այդպես չէ։ Գործընթաց կա, շարժ կա դեպի Արևմուտք, բայց թե ինչով այն կավարտվի, դժվարանում եմ ասել։ Ռուսաստանը ձգտում է, որ այդ շարժը չլինի»,- նշեց նա։

Քեռյանը չի բացառում, որ այդ հանդիպումները պլանավորվել են ռուսական կողմի նախաձեռնությամբ, բայց, եթե հայկական կողմն է նախաձեռնողը, նշանակում է՝ հասկացել են, որ եվրոպացիների 100 հոգանոց ջոկատը փրկություն չէ վերահաս սպառնալիքներին ընդառաջ։

«Մեզ մոտ անգլո-ամերիկյան կամ ֆրանսիական զորքեր չկան, գուցեև կատաստրոֆայից առաջ սթափվե՞լ են, կամ էլ՝ կարող է պատահել՝ ռուսական կողմն է զգուշացնում Հայաստանին սպասվելիք վտանգների մասին։ Այդ հանդիպումներն ու այցը վկայում են, որ դեռ հնարավոր է՝ ինչ-որ պայմանավորվածությունների գալ»,- հավելեց քաղաքագետը։

Հիշեցնենք, որ երեկ երկօրյա այցով Հայաստան է ժամանել ՀԱՊԿ գլխավոր քարտուղար Իմանգալի Տասմագամբետովը, որն այցելել է Ջերմուկ, մի շարք հանդիպումներ ունեցել տեղական իշխանությունների, զինված ուժերի ներկայացուցիչների հետ։

ՌԴ ԱԳՆ հատուկ ներկայացուցիչ Մարիա Զախարովան երեկ հայտարարեց, որ մարտի 20-ին Մոսկվայում տեղի կունենա ՀՀ և ՌԴ ԱԳ նախարարներ Արարատ Միրզոյանի և Սերգեյ Լավրովի հանդիպումը։ Արտաքին գերատեսչությունների ղեկավարների հանդիպման լուրը հաստատել է նաև ՀՀ ԱԳՆ մամուլի խոսնակ Անի Բադալյանը։

Աղբյուր` Փաստինֆո