Փաստ ինֆո

Ադրբեջանի նախագահ Իլհամ Ալիևի հայտարարություններն ու ադրբեջանական լրատվամիջոցներով պարբերաբար տարածվող տեղեկատվությունը, թե, իբր, հայկական ԶՈՒ-ն կրակ է բացել ադրբեջանական դիրքերի ուղղությամբ, մեկ նպատակ ունեն՝ հասնել նրան, որ հայկական կողմը, ճնշումների հետևանքով զիջումների գնա և համաձայնի  Սյունիքով միջանցք տրամադրել, ինչպես նաև  Արցախի պաշտպանության բանակը վերջնականապես զինաթափել, հակառակ դեպքում՝ պաշտոնական Բաքուն սպառնում է ուժի գործադրմամբ այդ ամենին հասնել։ Այս մասին «Փաստինֆո»-ի հետ զրույցում ասաց քաղաքագետ Գարիկ Քեռյանը։

«Հնարավոր ռազմական գործողությունները լինելու են երկու ուղղությամբ՝ 1-ինը՝ բացել այդ արտատարածքային միջանցքը Սյունիքում, երկրորդը՝ մտնել Արցախ և զինաթափել պաշտպանության բանակի բոլոր ստորաբաժանումները, թե դա ի՞նչ հետևանքներ կունենա, ո՞վ կմիջամտի, ո՞վ կօգնի, ես դժվարանում եմ ասել։ Շատ հնարավոր է, որ ոչ ոք էլ չօգնի»,- նշեց նա։

Քաղաքագետը կարծում է, որ տեսակետը, թե Իրանը կկանխի Ադրբեջանի ռազմական ագրեսիան, այդքան էլ արժանահավատ չէ։ Ճիշտ է՝ մեր հարևան ԻԻՀ-ի համար Սյունիքը կարևոր  ստրատեգիական նշանակություն ունի և Իրանում ամեն դեպքում կաշխատեն, որ Սյունիքը հայկական մնա, սակայն Ադրբեջանի հետ ևս լուրջ ռազմական բախման չեն գնա։

«Ադրբեջանի հետ պատերազմի մեջ մտնել, նշանակում է մեխանիկորեն պատերազմել Թուրքիայի, Իսրայելի նաև Արևմուտքի հետ, որին Իրանը չի գնա։ Թուրքիան ՆԱՏՕ-ի անդամ է, ինչը կստիպի Իրանի ղեկավարությանը «7ը չափել՝ մեկը կտրել»»,- ասաց Քեռյանը։

Արևմուտքը ևս չի կարող Ադրբեջանի ձեռքերը կապել. նախ մեր տարածաշրջանում ռազմական ներկայություն չունի, և երկրորդ՝ Ադրբեջանի նկատմամբ պատժամիջոցներ կիրառելիս զսպվածություն կցուցաբերի, քանի որ  Ադրբեջանն այսօր ԵՄ համար հանդիսանում է հուսալի գործընկեր էներգետիկ համագործակցության առումով։

«Կարծիք կա, որ Արևմուտքը թույլ չի տա։ Աստված տա՝ ճիշտ լինի, բայց ի՞նչ գործիքակազմով, ի՞նչ միջոցներով. այս հարցադրումների տակ մի մեծ հարցական ենք դնում և ապավինում ենք Աստծո զորությանը»,- նկատեց քաղաքագետը։

Հիշեցնենք, որ Ադրբեջանի նախագահ Իլհամ Ալիևը Անկարայում ընթացող Թյուրքական պետությունների կազմակերպության արտահերթ գագաթնաժողովում հայտարարել է,  թե Հայաստանը խուսափում է Զանգեզուրի միջանցքը բացելու իր պարտավորությունից, թեեւ նույն Ալիեւը ընդունել էր, որ 2020 թվականի նոյեմբերի 9-ի եռակողմ հայտարարության մեջ նման միջանցք նախատեսված չէ։

Աղբյուր` Փաստինֆո