Փաստ ինֆո

Անուշ Եսայանն Արցախում միկրոկանաչիներ է աճեցնում։ Սեփական՝ թեկուզ փոքրիկ գործ սկսելու նրա ցանկությունը պատերազմից հետո է ծնվել։ Մեկ տարվա փնտրտուքներից հետո Անուշը որոշել է միկրոկանաչիների մշակությամբ զբաղվել։

«Միկրոկանաչիների մշակությունը և՛ էսթետիկ հաճույք է պատճառում, և՛ նորություն է, և, ամենակարևորը՝ առողջարար է։ Եթե բանջարեղենը հողում աճեցնելու դեպքում որոշ սերմեր թունախեղդում են, որպեսզի կրծողները չվնասեն, այս դեպքում նման խնդիր չի լինում։ Լիովին էկոլոգիապես մաքուր ու առողջարար մթերք ենք ստանում։ Վիտամիններն էլ մի քանի անգամ ավելի շատ են միկրոկանաչիների մեջ, քան սովորական պայմաններում աճեցրած կանաչիների»,- «Փաստինֆո»-ի հետ զրույցում ասում է երիտասարդ ձեռներեց Անուշ Եսայանը։

Միկրոկանաչիների մշակությունն Անուշը տանն առանձնացված անկյունում է կազմակերպում. Դեռ ջերմոց չունի, աբյց այս տարվա ծրագրերի մեջ այդ նպատակով առանձին տարածք ձեռք բերելն է։ Հարմար տարածք ունենալուց հետո տեսականին էլ կըդլայնվի. Հիմա կանաչիների 15 տեսակ է ցանում՝ կաղամբ, բողկ, մամանեխ, ռեհամ և այլն։

Աճեցնում եմ կոկոսի մանրաթելերի մեջ։ Թե հումքը, թե սերմերը Հայաստանից կամ Ռուսաստանից եմ բերել տալի։ Նախքան շրջափակումը որոշ քանակությամբ ունեի, դեռ հերիքում է։ Մարդիկ դեռ լավ տեղեկացված չեն միկրոկանաչիների մասին. Արցախում առայժմ միայն ես եմ այդ գործով զբաղվում, բայց շրջափակումը որոշ չափով մեծացրեց վաճառքը»,-ասում է Անուշը։

Օրվա մեջ Անուշն ընդամենը 2-3 ժամ է տրամադրում յուրահատուկ բիզնեսին։ Ասում է՝ շատ խնամք չեն պահանջում, փոխարենը՝ վիտամինաշատ են, մաքուր, 6-7 օրը մեկ էլ պատրաստ են լինում օգտագործման։

Ընդամենը 10-15 սմ բարձրության, փոքր տերևներով ցողունները, որոնք օգտագործվում են թարմ վիճակում՝ թե ճաշերի, թե աղցանների մեջ, Անուշը հաճախորդներին հանձնում է հումքի՝ կոկոսի մանրաթելերի հետ, որպեսզի գնորդը կարողանա թարմ «թփից» քաղել ու վայելել։

Աղբյուր` Փաստինֆո