Փաստ ինֆո

Փաշինյանի՝ ասուլիսին արված այն հայտարարությունից, թե ԱԳՆ-ին հանձնարարել է տեղահանվածների վերադարձի հարցով քննարկումներ սկսել ՄԱԿ-ի՝ փախստականների հարցերով գերագույն հանձնակատարի հետ, պարզ երևում է, որ տեղահանվածների հարցով լրջորեն զբաղվելու որևէ մտադրություն չունի ՀՀ ղեկավարությունը։ «Փաստինֆո»-ի հետ զրույցում նման կարծիք հայտնեց «Հանուն Հադրութի» ՀԿ նախագահ Լևոն Հայրիյանը։

«Ուղղակի, աբսուրդ է խոսել ինչ-որ միջազգային երաշխիքների դեպքում Հադրութ կամ բռնազավթված այլ բնակավայր վերադառնալու մասին։ Կա՛մ Փաշինյանն է հիմար, կա՛մ մեզ է հիմարի տեղ դնում։ Քանի դեռ Ադրբեջանը վերահսկողություն ունի Հադրութի վրա, որքան էլ որ միջազգային կառույցները երաշխիքներ տան, բացառվում է մեր վերադարձն այնտեղ։ Պատերազմի ընթացքում ամբողջ աշխարհն է տեսել, թե ինչպես էին ադրբեջանցիները կտրում հայ գերիների գլուխները։ Որքա՞ն միամիտ պետք է լինենք, որ վստահենք բացառապես միջազգային ինչ-որ կառույցների երաշխիքներին ու գնանք՝ ապրելու ադրբեջանական տիրապետության տակ»,-ասաց Հայրիյանը։
Մեր զրուցակցի խոսքով՝ իրենք նաև օրերս ՀՀ ԱԽ քարտուղար Արմեն Գրիգորյանի հետ ունեցած հանդիպման ժամանակ են ընդգծել, որ Արցախ կվերադառնան ինքնորոշման պարագայում, իսկ կոնկրետ Հադրութ՝ ազատագրելուց հետո։

«ԱԽ քարտուղարին հստակ ասել ենք նաև՝ քանի դեռ դրանցից ոչ մեկին չենք հասել, տեղահանվածների համար գոնե համայնք պետք է կառուցվի ՀՀ-ում, որպեսզի Հադրութն ու Շուշին չարժանանան Շահումյանի ճակատագրին։ Պարզ է, որ եթե այսպես մնա, մարդիկ ցրվելու են աշխարհով մեկ, իսկ եթե համայնք լինի, հավաքվելու են, շարունակելու են ապրել իրենց ավանդույթներով՝ մինչև կգա այն օրը, որ հետ կբերենք Հադրութն ու կվերադառնանք մեր տները»,-ասում է Հադրութից տեղահանված Լևոն Հայրիյանը։
Մեր զրուցակիցը շեշտում է՝ տեղահանվածներին փախստականի կարգավիճակ տալու, նրանց իրավունքները հստակեցնելու իրավազորություն ունի ՀՀ ղեկավարությունը։ Այդ մասին, նրա խոսքով, բազմիցս փաստել են նաև ՄԱԿ-ի հայաստանյան գրասենյակը, այն երկրների դեսպանատները, որտեղ դիմել են։

ՄԱԿ-ի հայաստանյան գրասենյակից ստացված պաատսխան նամակը, որում արձանագրված է, որ մեր կարգավիճակի հարցը ՀՀ ղեկավարության տիրույթում է, փոխանցել ենք ԱԽ քարոտւղարին, որպեսզի էլ չփորձեն ծամածռություններ անել, թե մեզնից կախված բան չկա»,-նշեց Հայրիյանը և հավելեց՝ ցանկացած ոք, ով կփորձի տեղահանվածներին վերադարձնել Ադրբեջանի հսկողության տակ գտնվող տարածքներ, պետական դավաճան է։ Նրա խոսքով՝ այդ քայլը կնշանակի՝ օգնել ադրբեջանցիներին՝ ցեղասպանել այդ մարդկանց։

Հայրիյանը վստահեցնում է՝ որևէ միջազգային կառույց կամ երաշխիք ավելի լավ չի կարող սաստել Ադրբեջանին, թույլ չտալ ցեղասպանել հայերին, քան սեփական ուժեղ պետությունը։ Ըստ այդմ՝ վերջինս շեշտում է՝ եթե ուզում ենք ապրել մեր հողում՝ Հայաստան-Արցախում, ապա ՀՀ ղեկավարությունն օրնիբուն պետությունն ու բանակն ուժեղացնելու ուղղությամբ պետք է աշխատի։

Աղբյուր` Փաստինֆո