Փաստ ինֆո

Ադրբեջանի բռնապետական ռեժիմը, անտեսելով Արդարադատության միջազգային դատարանի որոշումը, ոչ միայն շարունակում է փակ պահել Արցախն աշխարհին կապող միակ ճանապարհը՝ Լաչինի միջանցքը, այլև լկտիաբար առաջ տանել այն անընդունելի ու կեղծ թեզը, թե, իբր, «Արցախի հայության «վերաինտեգրման» ուղղությամբ քայլեր են ձեռնարկվում»։

Արձագանքելով ՀՀ ԱԳՆ՝ երեկ տարածած այն հաղորդագրությանը, որով դատապարտվել է Ալիևի ռազմատենչ հռետորաբանությունը՝ մտացածին «արևմտյան Ադրբեջան»-ի տակ ՀՀ ինքնիշխան տարածքի նկատմամբ ցուցաբերած բացահայտ նկրտումների համար, ալիևյան ռեժիմը հայկական կողմին մեղադրել է երեշպաշտության ու տարածաշրջանում կայունության հաստատմանը խոչընդոտելու մեջ։

«Ադրբեջանը երկխոսում է հայ բնակիչների հետ և, որպես բարի կամքի դրսևորում, առաջարկել է հաջորդ հանդիպումն անցկացնել Բաքվում, իսկ Հայաստանն էլ, հակառակը՝ մերժել է «արևմտյան Ադրբեջանի» համայնքի հետ երկխոսելու առաջարկը»,-ասված է Ադրբեջանի ԱԳՆ տարածած հաղորդագրության մեջ։

Հիշեցնենք, որ օրեր առաջ Ադրբեջանը ոչ միայն ապատեղեկատվություն տարածեց, թե, իբր, արցախյան կողմի հետ հանդիպմանը քննարկվել է ինտեգրման հարց, այլև ալիևյան ռեժիմին ծառայող լրատվամիջոցներով արցախյան կողմին ցինիկաբար առաջարկեց հանդիպել Բաքվում։

Ադրբեջանի ցնդաբանություններին Արցախի ԱԳՆ-ն հրապարակային պատասխանել էր հետևյալ կերպ. «Արցախի Հանրապետությունը հավատարիմ է նախկինում հայտնած իր դիրքորոշմանն առ այն, որ նման հանդիպումներ կարող են տեղի ունենալ ՌԴ խաղաղապահների միջնորդությամբ, նույն վայրում՝ ինչպես ս.թ. մարտի 1-ին, հումանիտար, ենթակառուցվածքային, տեխնիկական հարցերի շուրջ՝ առանց դրանց անհարկի քաղաքականացման»։

«Փաստինֆո»-ն նաև Արցախի նախագահի մամուլի խոսնակից տեղեկացել է, որ մարտի 1-ից հետո արցախյան կողմն ադրբեջանական կողմի հետ որևէ հանդիպում չի ունեցել։

Աղբյուր` Փաստինֆո