Փաստ ինֆո

Վերաքննիչ քրեական դատարանի դատավոր Մեսրոպ Մակյանը գտնում է, որ ԲԴԽ-ում որևէ ճգնաժամ չկա, կա բացարձակ կոնսենսուս։

«Եթե ուշադիր եք լինում, վերջին շրջանում բոլոր որոշումները միանձնյա են ընդունվում։ Իհարկե, դրա ետևում կա և՛ բանավեճ, և քննարկումներ, բայց բոլորը գործընկերային շրջանակներում, որի արդյունքում ծնվում է այն որոշումը, որի տակ ստորագրում են ԲԴԽ բոլոր անդամները»,- լրագրողների հետ զրույցում ասաց Մեսրոպ Մակյանը։

Անդրադառնալով ԲԴԽ հասցեին հնչող քննադատություններին, համաձայն որի՝ ԲԴԽ-ն ավելի շատ դատավորների լիազորություններ է դադարեցնում, խնդիրներ ստեղծում, քան՝ երաշխավորում անկախությունը՝ Մակյանը նշեց, որ ցանկացած քննադատության նորմալ է վերաբերում, որովհետև և՛ հանրությունը, և՛ հանրային տարբեր շերտեր իրավունք ունեն կարծիք ունենալու տարբեր երևույթների վերաբերյալ, համակարծիք չէ այն նկատառումների հետ, որ վերջին շրջանում ԲԴԽ-ն ավելի շատ դատավորների լիազորություններ է դադարեցնում:

«Պետք է նայել ամբողջ գործունեության կտրվածքով, թե օրինակ՝ որ ժամանակահատվածում որքան են եղել կարգապահական վարույթները, դրանցից որ մասն է մերժվել, որ մասը՝ բավարարվել: Համոզված եղեք, որ դրանց հարաբերակցությունը՝ 30/70 է, այսինքն՝ 70 տոկոս դեպքերում ԲԴԽ-ն մերժել է ներկայացված միջնորդությունները, հետևաբար, խոսել այն մասին, որ ԲԴԽ-ն չի ապահովում դատավորների անկախությունը և նրա երաշխավորը չէ, ես համաձայն չեմ այդ պնդման հետ»,- նշեց Մակյանը։

Ինչ վերաբերում է իր պաշտոնի առաջխաղացմանը, որդուն դատավոր դարձնելու և եղբոր վերաբերյալ քրեական գործով կաշկանդվածություն ունենալու մասին քննադատություններին, դատավորը նշեց. «Զանազան ասեկոսեները չեմ ցանկանում մեկնաբանել, չգիտեմ՝ ինչի մասին եք խոսում: Իմ որդին ընդամենը մեկ տարի է աշխատում այս համակարգում, իրավաբան է, իրավունք ունի աշխատելու, չգիտեմ՝ հետագայում ինչ ճանապարհ կընտրի: Ձեր կարծիքով ես առաջխաղացման արժանի՞ եմ, թե՞ ոչ»։

Մանրամասները՝ տեսանյութում

Աղբյուր` Փաստինֆո