Փաստ ինֆո

Ի հեճուկս արդարադատության միջազգային դատարանի որոշման՝ Ադրբեջանը շարունակում է ապօրինի կերպով փակ պահել ԼՂ Հայաստանին կապող Լաչինի միջանցքի միակ անցանելի ճանապարհը։ Հումանիտար վիճակը շարունակում է մնալ լարված, միևնույն ժամանակ՝ ԼՂ հետ շփման գծում ռազմական իրավիճակը սրելուն ուղղված կոնկրետ գործողություններ է իրականացնում Ադրբեջանը։ Այդ մասին Կառավարության նիստից առաջ հայտարարեց Նիկոլ Փաշինյանը՝ հավելելով, որ մարտի 5-ին՚ ԼՂ ոստիկանության երեք աշխատակիցների սպանությունն Ադրբեջանի կողմից դրա վառ վկայությունն է։

«Ադրբեջանի իրականացրած սպանությունները 2020թ. նոյեմբերի 9-ի եռակողմ հայտարարության եռակի խախտում է. խախտվել է ոչ միայն հրադադարը, շփման գիծը, այլև Լաչինի միջանցքի հինգ կմ-ոց գոտին։ Ադրբեջանի պետական և մերձպետական քարոզչությունը տևական ժամանակ է՝ ԼՂ նկատմամբ հարձակման ինմֆորմացիոն ֆոն է ստեղծում։ Լարվածության միտումները տեսնելի են նաև գետնի վրա։ Մեր գնահատականը շարունակում է մնալ նույնը՝ Ադրբեջանի ռազմական ղեկավարությունը ԼՂ ժողովրդի նկատմամբ էթնիկ զտումների, ցեղասպքանության նախապատրաստություններ է տեսնում։ Այս իմաստով կարևոր և անհետաձգելի եմ համարում, որ Հայաստանը միջոցներ ձեռնարկի ցեղասպանությունների կանխարգելման միջազգային մեխանիզմների գործարկման ուղղությամբ»,-նշեց վարչապետը։

Փաշինյանը նաև նշեց, որ դրա հետ կապված ԱԳՆ-ին համապատասխան հանձնարարականներ են տրվել։ Միաժամանակ շարունակվում են աշխատանքները՝ Լաչինի միջանցք միջազգային փաստահավաք առաքելություն գործուղելու ուղղությամբ։

«Դա կարևոր է նաև այն առումով, որ հերքվեն Ադրբեջանի անհիմն պնդումներն այն մասին, թե, իբր ՀՀ-ից ԼՂ զենք է տեղափոխվում։ Ադրբեջանը փորձում է դա տարածաշրջանային նոր էսկալացիայի պատրվակ դարձնել, հետևաբար միջազգային փաստահավաք առաքելության գործողումը ԼՂ և Լաչինի միջանցք, նաև այս առումով է դառնում անհրաժեշտություն»,-շեշտեց վարչապետը։
Անդրադառնալով Ադրբեջանի կողմից Արցախում էթնիկ զտումների նախապատրաստությանը՝ Փաշինյանն արդարացված համարեց առնվազն ՊԲ-ի գոյությունը։

«ԼՂ-ում, ինչպես գիտեք, կա պաշտպանության բանակ և այնքան ժամանակ, քանի դեռ ԼՂ ժողովրդի վրա կախված է էթնիկ զտումների և ցեղասպանության վտանգը, այդ բանակի գոյությունը արդարացված է։ ՊԲ-ն, սակայն, ԼՂ ժողովրդի ցեղասպանության կանխարգելման միակ մեխանիզմը չէ։ Այդպիսի մեխանիզմ է նաև ԼՂ-ում ռուսական խաղաղապահ զորախումբը»,-ասաց Փաշինյանը։

Աղբյուր` Փաստինֆո