Փաստ ինֆո

Երբ երկրի ղեկավարը չորսուկես ժամանոց ասուլիս է տալիս՝ ըստ էության՝ եկել եմ ասելու, որ իմ վրա հույս չդնեք, հետայսու ես ոչ պատասխանատու եմ, ոչ էլ՝ մեղավոր՝ տոնայնությամբ, քանզի իր կարծիքով՝ մանիպուլյացիայի զորավոր, անբեկանելի և, ըստ էության, հիմնական պատճառ է գտել, այն է՝ «քանդվող, խորտակվող» տարածաշրջանում ենք ապրում։

Այսինքն, նա եկել էր ասելու, որ մոտակա պատերազմն անխուսափելի է, բայց այս համատեքստում «ինքը» ոչինչ չի որոշում։ Եվ քանի որ Լյուդովիկոս 14-ին վերագրվող «պետությունը ես եմ» կարգախոսը նրան էլ շատ հոգեհարազատ է՝ շատ պարզ հասկացնում է՝ Հայաստանը ոչինչ չի որոշում։

Եվ գիտե՞ք որն է ուշագրավը, առանց այդ էլ՝ արտաքին աշխարհի հետ հարաբերություններում իր հետ հույս կապող զանգված երկրում շատ քիչ է մնացել, բայց ամեն դեպքում նա երեկ եկել էր ապահովագրելու իր անձը՝ «ես զգուշացրեցի, հետո չասեք՝ չես ասել» տրամաբանության մեջ։

Այսքանից հետո՝ կա՞ մարդ, որ չի հասկանում՝ այս անձը պիտի հեռանա։ Պիտի հեռանա, քանի որ իրեն հիմա ո՛չ Արցախը, ո՛չ էլ Հայաստանը չեն հետաքրքրում, ինքը բացառապես իր հետագա ճակատագրի մասին է մտածում։

Բայց եկեք-տեսեք, որ սույնը արդեն որերորդ անգամ հայտարարում է, որ ինքը չի պատրաստվում հեռանալ, որ ինքը վարչապետի պաշտոնը «ժողովրդի կամքով և ցանկությամբ», 2021-ին էլ՝լեգիտիմ ընտրությամբ է ստանձնել և իրավունք չունի ժողովուրդից ստացած մանդատն ուրիշին հանձնել։ Իսկ թե «ժողովրդից» ստացած իշխանությունը ո՞նց է կարողացել ինքն իրացնել, ո՞րքանով է օգտակար եղել այն ժողովրդի համար, դատեք ինքներդ։

Բոլոր ոլորտների թռիչքային հեղափոխություններից ճամարտակելով՝ կառավարման համակարգը, կայացած ինստիտուտները կազմաքանդելով՝ 2020 թվականին իր իսկ գործողություններով պատերազմ հրահրելով՝ սույնը պարտության մատնեց երկիրը՝ բերելով և՛ մարդկային, և տարածքային հսկայական կորուստներ, ըստ էության, Արցախի Հանրապետության 75 տոկոսը ազարբայջանին հանձնելով և բանակը կազմաքանդելուց հետո էլ մեր 120 հազար հայրենակիցներին անպաշտպան, բացառապես ռուս խաղաղապահների հույսին թողնելով․․․

Այն, որ այս խայտառակ պարտությունից հետո հայության մի զգալի հատված ընտրություններում իր քվեն նվիրելով պարտություն բերածին՝ թույլ տվեց նրան շարունակել պաշտոնավարումը՝ ավելի երկար մնալով իշխանության ղեկին, շատ ամոթալի պատմություն է։

Հիմա այս մարդը՝ պատերազմ ու պարտություն բերածը, իր իսկ հորինվածք՝ «խաղաղության օրակարգի» ամբողջական ձախողումն արձանագրելուց և խոստովանելուց հետո անգամ հայտարարում է, որ հեռանալ չի պատրաստվում։

Ի դեպ, իր գունավոր հեղափոխության նշանաբան՝ «կոռուպցիայի դեմ պայքարի» տապալումն իր իսկ խոստովանությամբ և այս օրերին բացահայտված՝ իր թիմի կատարած կոռուպցիոն հանցանքներով է նաև փաստվում, ինչը հաստատում և վերահաստատում է՝ բոլոր ուղղությունները տապալած, երկրին աղետ բերած, Հայաստանն ու Արցախը վերջնական կործանման տանող արկածախնդիր մեկի հետ գործ ունի հայությունը։

Իսկ ի՞նչ է անում հայաստանյան ընդդիմությունը։ Ոչինչ, ուղղակի արձանագրում է ամեն օր լրատվամիջոցների արձանագրածը, մատնացույց արածը։ Փաստն այն է, որ ընդդիմությունը վերջնականապես տուն գնաց՝ իր անհաջողությունների մեղքը գցելով ժողովրդի վրա։ Ժողովուրդը դուրս չեկավ, անհրաժեշտ քանակի ժողովուրդ չհավաքվեց և այլն․․․ Իրականում սա շատ տխուր պատմություն է։ Այդ թվում նաև՝ կուսակցությունների մայրամուտը փաստող․․․

Ինչ վերաբերվում է՝ երեկվա երկարատև ասուլիսից հետո սեփական կուսակցության նույնքան երկարատև ժողովը վարողին, ապա նրա համար Հայաստանի վարչապետի պաշտոնը շարունակում է զուտ փրկօղակ լինել։ Եվ որքան շարունակվում է այս վիճակը, այնքան Հայաստանի և Արցախի շուրջ օղակը սեղմվում է։

Աղբյուր` Փաստինֆո