Փաստ ինֆո

ԱԺ «Քաղաքացիական պայմանագիր» խմբակցության պատգամավոր, ՀՀ առողջապահության նախկին նախարար Արսեն Թորոսյանը պատճառ չի տեսնում՝ «Քովիդի» գործով դատախազի կողմից իրեն անձեռնմխելիությունից զրկելու միջնորդությամբ ԱԺ դիմելու համար։ Նա նաև հերքում է՝ իր հնարավոր հրաժարականի մասին լուրը։

Անդրադառնալով իր կողմից ավելի վաղ արված հայտարարություններին, որով փաստացի քննադատություն էր հնչեցվել իրավապահների նկատմամբ՝ Թորոսյանը լրագրողների հետ զրույցում նշեց. «Դա ընդհանրապես ինձ հետ կապ չունի, պետք չէ այնպիսի ձևակերպումներ անել, թե իմ նկատմամբ ինչ-որ գործողություններ են իրականացվել։ Շատ հստակ իմ երկու հաղորդագրությունների մեջ նշել եմ պրոբլեմների վերաբերյալ և հույս ունեմ, որ այն մարմինները, որոնք այդ պրոբլեմներով զբաղվում են, նաև իրենց ներքին ընթացակարգերով կպարզեն, թե ինչու է այդ ամենը տեղի ունեցել։ Ի վերջո, արդարադատությունը կհաղթի։ Այն մեղադրանքները, որոնք այդ տեքստի մեջ գրված էին, որևէ կերպ չէին կարող առնչվել դուրս գրման ՏՐԻԱԺ խմբի ղեկավարին և որևէ փոխնախարարի, որովհետև նման վերահսկողական գործառույթ նրանք չեն ունեցել և չէին կարող ունենալ, բացառությամբ այն դեպքերի, եթե ինչ-որ կազմակերպված հանցավոր խումբ չէր աշխատում, ինչի մասին ապացույցներ այս պահին առնվազն ես, չգիտեմ, որ կան»։

Արսեն Թորոսյանի խոսքով՝ բոլոր հարցերը պետք է պատասխաններ ստանան, թե չէ կստացվի, որ ցանկացած պաշտոնյայի ինչ-որ բան չանելու համար կարելի է դատել, անկախ նրանից՝ այդ ինչ-որ բանը նա պետք է աներ, թե՝ ոչ։ Արսեն Թորոսյանը հայտնեց, որ ինքը չի հարցաքննվել։

«Ինձ և գործող նախարարին հարցաքննելու դեպքում այս մեղադրանքն ընդհանրապես առոչինչ կդառնար»,-նշեց Թորոսյանը՝ հավելելով, որ պատրաստ է հարցաքննվել։

Աղբյուր` Փաստինֆո