Փաստ ինֆո

Կարող ենք արձանագրել, որ ՌԴ-ն պաշտոնապես արձանագրել է ԼՂ քաղաքացիական բնակչության զանգվածային սպանության հավանականությունը և ստանձնել ԼՂ ժողովրդի և քաղաքացիական ենթակառուցվածքների անվտանգության երաշխավորի դերակատարումը։ Այդ մասին գործադիրի նիստից առաջ հայտարարեց Փաշինյանը։

«Մենք հույս ունենք, որ ՌԴ-ն նշված գործառույթը կկատարի լիարժեք, բայց եթե մեր բարեկամ և դաշնակից ՌԴ-ն որևէ օբյեկտիվ պատճառով չի կարող դա անել, հենց ինքը պետք է դիմի ՄԱԿ-ի ԱԽ՝ ահազանգելով ԼՂ բնակչության, զանգվածային ենթակառուցվածքների ոչնչացման վտանգի մասին և նշի ԼՂ-ում և Լաչինի միջանցքում լրացուցիչ միջազգային մեխանիզմներ գործարկելու անհրաժեշտության մասին»,-ասաց վարչապետը։

Շեշտելով, որ որևէ կանխավարկած չունի ԼՂ-ում ռուսական խաղաղապահ զորախմբի գործունեության վերաբերյալ, Փաշինյանը նշեց, որ վերջին ավելի քան երկու տարում տեղի ունեցած իրադարձությունները՝ Խծաբերդի, Հին Թաղերի օկուպացիան, ոստիկանության աշխատողների և քաղաքացիական անձանց սպանությունները, հրադադարի ռեժիմի պարբերական խախտումներն Ադրբեջանի կողմից ամեն դեպքում անհանգստացնում են։

«Ադրբեջանն ամեն ինչ անում է Բաքու-Ստեփանակերտ երկխոսությունը վիժեցնելու համար։ Ի հեճուկս միջազգային մակարդակով ձեռք բերված պայմանավորվածությունների՝ ընդամենը երկու հանդիպումից հետո Ադրբեջանը հայտարարում է, թե ԼՂ հայերի հետ քննարկելու է վերաինտեգրման թեմա, մինչդեռ միջազգային պայմանավորվածությունն այն մասին է, որ քննարկումը պետք է լինի ԼՂ ժողովրդի իրավունքների և անվտանգության շուրջ։ Այս ֆոնին առավել կարևոր է դառնում Ստեփանակերտ-Բաքու երկխոսության միջազգային մեխանիզմի գործարկումը, քանի որ հիմա ակնհայտ է, որ առանց նման մեխանիզիմի՝ օրակարգի կձախողվի»,-շեշտեց Փաշինյանը։

Ուշադրություն հրավիրելով 2020թ. նոյմեբերի 9-ի եռակողմ հայտարարության 7-րդ կետի վրա՝ վարչապետը շեշտեց.

«ԼՂ Հադրութի, Շուշիի, Մարտունու, Մարտակերտի, Շահումյանի, Քաշաթաղի և ԼՂ հարակից այլ շրջանների հայերի վերադարձի միջազգային մեխանիզմներ պետք է գործարկվեն և ԱԳՆ-ին հանձնարարել եմ այս թեմայով պաշտոնական բանակցություններ սկսել ՄԱԿ-ի փախստականների հարցերով գլխավոր հանձնակատարի հետ։ Այս հարցերով պետական մարմինների են դիմում նաև Բաքվի, Շիրվանի, Սումգայիթի, Խանլարի, Նախիջևանի և Ասդրբեջանի այլ շրջանների էթնիկ զտման ենթարկված հայության ներկայացուցիչներ, թե ինչու մենք չենք բարձրացնում նրանց՝ իրենց տները վերադառնալու ահրցը։ Խնդիրն այն է, որ 7-րդ կետը վերաբերում է միայն ԼՂ և հարակից շրջաններից տեղահանվածներին, բայց սա չի խանգարում, որ Ադրբեջանում էթնիկ զտման ենթարկվածների ներկայացուցիչներն ինքնակազմակերպվեն և գույքային, վերադարձի և այլ իրավուքնեը պաշտանեն միջազգային ատյաններում»։

Աղբյուր` Փաստինֆո