Փաստ ինֆո

Նիկոլ Փաշինյանն այսօր մի շարք ուշագրավ հայտարարություններ է հնչեցրեց կառավարության նիստում, այդ թվում՝ բռնի տեղահանվածներին իրենց բնակության վայրեր վերադառնալու միջազգային կառուցակարգերը գործարկելու մասին։ Թեմայի վերաբերյալ «Փաստինֆո»-ի հարցերին է պատասխանում իրավապաշտպան Ավետիք Իշխանյանը։

-Պարոն Իշխանյան, ՀՀ վարչապետ Նիկոլ Փաշինյանը մի կողմից հայտարարում է Արցախի «ժողովրդի էթնիկ զտման ու ցեղասպանության վտանգի» մասին, մյուս կողմից ասում է, որ հանձնարարարել է ԱԳՆ–ին՝ բանակցություններ սկսել ՄԱԿ-ի Փախստականների հարցերով գլխավոր հանձնակատարի հետ` տեղահանված հայերին Լեռնային Ղարաբաղ վերադարձնելու վերաբերյալ։ Ո՞վ է ապահովելու վերջիններիս անվտանգությունը և արդյո՞ք Նիկոլ Փաշինյանի ասածների մեջ հակասություն կա։

-Անշնորհակալ գործ է վարչապետ կոչեցյալի խոսքերի մեկնաբանությունը։ Նա այսօր այս կասի, վաղը՝ մեկ այլ բան և կգործի բոլորի համար անսպասելի՝ հերթական դավաճանական կերպ։ Համոզված եմ՝ նրան բացարձակապես չի հետաքրքրում ոչ միայն տեղահանված, այլև և՛ Արցախի, և՛ Հայաստանի ամբողջ բնակչության ճակատագիրը։ Իսկ նրա այդ խոսքերն ուղղակի ծիծաղելի են։ Միջազգային այս սրված իրավիճակում, նույնիսկ եթե լինեն այդպիսի բանակցություններ, դրանք որևէ արդյունք չեն տա։ Երկրորդ, եթե նույնիսկ այդ հարցը քննարկվի, ապա Ադրբեջանը կտրականապես դեմ կլինի և թույլ չի տա նման առաքելության մուտքը։ Այսպիսով՝ գործ ունենք հերթական, ներեցեք, փչոցի հետ։

-Կարելի՞ է ասել, որ սրանով Փաշինյանը հող է նախապատրաստում նաև Ալիևի 5 պահանջներից մեկի՝ «ադրբեջանցի փախստականների» վերադարձի համար։

-Չեմ բացառում։ Ինչպես նա հինավուրց հայկական մշակութային կենտրոն Շուշին համարեց ադրբեջանական քաղաք, հայկական բնակավայրերը կոչեց ադրբեջաներեն, կարելի է համոզված պնդել, որ այս ամենը եղել է նրա գաղտնի պայմանավորվածությունների հաշվին։ Իսկ, թե ապագայում նա ինչպիսի հերթական զիջումների կգնա, նույնպես, ըստ այդ նույն պայմանավորվածությունների, ցավոք դրանց ականատեսը կլինենք։

-Այսօր կառավարության նիստում Նիկոլ Փաշինյանը մեկ անգամ ևս խոսեց միջազգային փաստահավաք առաքելություն գործուղելու մասին՝ արցախցիներին սպառնացող ցեղասպանությունը կանխելու համար, քանի որ ռուսական խաղաղապահ զորախումբը չի կարողանում կատարել իր առաքելությունը։Կարո՞ղ ենք արձանագրել, որ Փաշինյանն արտաքին քաղաքական վեկտորի փոփոխության աշխատանքներին գործուն տեսք է հաղորդում։

-Սա նույնպես նրա գաղտնի պայմանավորվածությունների մասին է վկայում։ Կարծում եմ՝ նա հիանալի գիտակցում է խաղապահ ուժերի լիազորությունների շրջանակը։ Խաղաղապահ ուժերը պետք է կողմերի միջև չեզոքություն պահպանեն։ Այն, որ ադրբեջանական կողմը դիմում է սադրանքների, դրանց նպատակը հենց խաղաղապահ ուժերին վարկաբեկելն է։ Իսկ եթե խաղաղապահ ուժերը միջամտեն, ապա Ադրբեջանը կպահանջի նրանց հեռացումը։ Այսպիսով, կարելի է պնդել, որ Հայաստանի վարչապետ կոչեցյալն ու Ադրբեջանի նախագահը համատեղ գործում են ռուսական խաղաղապահներին հեռացնելու ուղղությամբ։ Այո՛, սա արտաքին քաղաքական վեկտորի փոփոխություն է, որը սկսվել է 2018թ․՝ Յուրի Խաչատուրովին մեղադրանք առաջադրելով, հետագայում պայմանավորված պատերազմ հրահրելով, պարտությամբ, տարածքների կորստով, հազարավոր զոհերով։

Եվս մեկ անգամ կրկնում եմ՝ վարչապետ կոչեցյալը կատարում է իր տերերի առջև ստանձնած պարտավորությունները։ Եվ այդ ամեն՝ Հայաստանի, Արցախի, հայ ժողովրդի հաշվին։

Աղբյուր` Փաստինֆո