Փաստ ինֆո

Լինի «5-րդ շարասյուն», թե «6-րդ, 7-րդ շարասյուն», չի կարելի սեփական բացթողումներն ու թերությունները թողած, այլ տեղերում մեղավորներ փնտրել։ Այս մասին «Փաստինֆո»-ի հետ զրույցում ասաց ազատամարտիկ, մահապարտ Եփրեմ Մարգարյանը՝ անդրադառնալով ՀՀ վարչապետ Նիկոլ Փաշինյանի այն դիտարկմանը, որ 44-օրյա պատերազմում հայկական ԶՈՒ-ն պարտություն է կրել, քանի որ բանակի շարքերում «5-րդ շարասյուն» է գործել։

«Գործող իշխանությունը թող մի բան հասկանա՝ իրենց թերությունները թող իրենց մեջ ման գան։ Այդ ի՞նչ է՝ կառավարությունում բոլորն անթերի են, մնացածը, որ իշխանություն չունեն, սև կարդինալներ են խաղո՞ւմ՝ դառան մեղավո՞ր, ով եկել, նստել է իշխանության, ով հանձն է առել պետությունը ղեկավարելու, ընդ որում նաև՝ ԶՈՒ գլխավոր հրամանատարի կոչումը։ Թող այնքան ուժեղ լիներ, որ «5-րդ շարասյունն» ազդեցություն չունենար։ Չէ՞ որ շատ բարձր-բարձր ասում էր՝ իմ հրամանատարական որակների վրա թող ոչ ոք չկասկածի, չենք կասկածում»,- նշեց նա։

Մարգարյանի կարծիքով՝ պատերազմում պարտության համար ազգովի ենք մեղավոր, քանի որ միասնական ու սրտացավ չենք։ Դրա հետևանքն է նաև այսօր դիրքերում տիրող իրավիճակը. պայմանագրային զինծառայողներից շատերը չեն սիրում իրենց դիրքի վրա աշխատել, որովհետև իրենց պետք չի, օրերն են հաշվում, թե երբ պետք է 14 օրը լրանա, գնան տուն, ժամկետայիններն էլ ասում են՝ «դե խի տանջվենք, որ թուրքերը տեխնիկայով են անում, մենք խի բահ ու քլունգ վերցնենք», մինչդեռ ՝ դիրքը նաև զինվորի տունն է։

«Մի 2-3 դիրք տանում են հանձնաժողովին ցույց են տալիս, որը որ լավ կահավորված է, բայց խորքում ընկած դիրքերն ահավոր վիճակում են։ Գործի դնելուց բացի՝ պետք է լինի նաև խստապահանջություն. մեծ պագոններով մարդիկ, որոնք նստած են դիվիզիոններում, կորպուսներում՝ մտածում են իրենց պաշտոնների մասին։ Հրամանատարներ կան՝ միայն քարտեզով գիտեն իրենց դիրքը՝ ծայրից ծայրը, իսկ տվյալ դիրքում մեկ անգամ չեն եղել»,- ասաց Մարգարյանը։

Ազատամարտիկի խոսքով՝ պարեկների համար նախատեսված մեկ մեքենայի գումարով կարելի է մի քանի դիրք կահավորել, այլ հարց է, որ մեզ ոչ թե բանակ, այլ ոստիկանապետություն է պետք։

«Այսքան ոստիկան, այսքան ուժային ի՞նչ են անում։ Ուզում ենք դիրքերը սարքել ու չեն կարողանո՞ւմ. ամբողջ Հայաստանը քար, ավազ, ցեմենտ է, մենք չէի՞նք կարող ուժեղ բունկերներ սարքել, մենք չէի՞նք կարող ուժեղ դիրքեր սարքել, ոչ թե ցելոֆոնով, վագոններով կամ գետինը փորենք, մտնենք, երկու հատ գերան գցենք, ժեշտը գցենք վրան, ու իմանանք, թե դիրք ունե՞նք»,- եզրափակեց ազատամարտիկը։

Աղբյուր` Փաստինֆո