Փաստ ինֆո

Պայմանագրային զինծառայողները լքում են ՊՆ համակարգը՝ նախընտրելով շարունակել աշխատանքը որպես պարեկ, որն առավել գրավիչ է դարձել իր բարձր աշխատավարձով։ Նման ահազանգեր «Փաստինֆո»-ն վերջին շրջանում ստանում է պարբերաբար, ինչը ստուգելու համար գրավոր հարցմամբ դիմել էինք ՀՀ ՊՆ։

Մասնավորապես խնդրել էինք տեղեկություն տրամադրել, թե վերջին շրջանում պայմանագրային քանի ծառայող է ազատվել պաշտոնից, եւ նրանցից քանիսը՝ սեփական դիմումի համաձայն, ինչը հնարավորություն կտար պարզելու, թե որքանով են հիմնավոր ստացվող ահազանգերն ու մտահոգությունները։ ՊՆ-ն հարցմանը պատասխանելու համար նախ 5 օրյա ժամկետ ուզեց՝ ուսումնասիրություններ կատարելու համար, եւ միայն օրեր առաջ ուղարկեց մի պատասխան, ինչն անուղղակի հավաստեց, որ խնդիրն, իրոք, լուրջ է։ Բանն այն է, որ ուսումնասիրություններից հետո ՊՆ-ն ուղղակի մերժել է տեղեկատվության տրամադրումը՝ այն համարելով գաղտնի՝ մեջբերելով ՀՀ կառավարության 13.03.1998թ N 173 որոշմամբ հաստատված ցանկի 3-րդ և 4-րդ կետերի, ՀՀ պաշտպանության նախարարի 09.07.2015թ. N 9-Ն հրամանի 1-ին հավելվածի 10-րդ գլխի ու 55-րդ կետի և «Տեղեկատվության ազատության մասին» ՀՀ օրենքի 8-րդ հոդվածի 1-ին մասի 1-ին կետի պահանջները։

Ակնհայտ է, որ տեղեկատվության գաղտնիության շղարշի ներքո փորձ է արվում թաքցնել բոլոր այն վտանգավոր միտումները, որոնք առկա են զինված ուժերում ու որոնց հետեւանքով հարվածի տակ է դրվում մեզանից յուրաքանչյուրի անվտանգությունը։ 30-օրյա ժամկետ ուզելուց հետո տեղեկատվության տրամադրման մերժումը գալիս է հիմնավորելու այն տեղեկությունները, որ իրապես քաղաքական իշխանությունն ամեն ինչ արել է առավել գայթակղիչ դարձնելու ոստիկանությունն ու պարեկային ծառայությունը, որի հետեւանքով խիստ ընկել է մեր բանակի մարտունակությունն ու ոգին։

Վիճակագրությունը, եթե իսկապես մտահոգիչ չլիներ, ապա ՊՆ-ն առնվազն պարտավոր էր ասել, որ X քանակի պայմանագրային զինծառայող է ազատվել, որ այսքան %-ը ինչ-ինչ խախտումների համար եւ սեփական դիմումով ազատվածներ չկան կամ շատ քիչ են։ Բայց ոչ, ՊՆ-ն նախընտրել է քողարկել իրավիճակը՝ դրանով իսկ մատնելով դրա լրջությունը։

Աղբյուր` Փաստինֆո