Փաստ ինֆո

ՀՀ պաշտպանության նախարար Սուրեն Պապիկյանի սրտով չէ, երբ ընդդիմությունը կամ էլ այս կամ այն լրատվամիջոցը բարձրաձայնում է բանակում առկա խնդիրների մասին։ Հայաստանի պաշտպանական գերատեսչության ղեկավարը չի թաքցնում ԶՈւ-ում վատ երևույթներ էլ կան, բայց թե դրանց մասին ամեն օր գրել, նշանակում է՝ պատվեր կատարել նրանց կողմից, ովքեր ծառայում են մեր պետության կենսունակությունը թուլացնելու գործին։

Նախարարը հորդորում է չխեղաթյուրել ՀՀ վարչապետ Նիկոլ Փաշինյանի դիտարկումը, թե ՀՀ ԶՈՒ-ն 44-օրյա պատերազմում պարտվել է ոչ թե ռազմամթերքի ու մարդուժի բացակայության, այլ նրա համար, որ բանակում «5-րդ շարասյուն է» գործել։ Պապիկյանի խոսքով՝ վարչապետը ոչ բոլորին է նկատի ունեցել, իսկ այդպիսիք եղել են։

««5-րդ շարասյունը» նրանց համար մեղմ է, դա ավելի շատ նման է դավաճանության։ Ես հիմա դրան ավելի խորքային չեմ անդրադառնա»,- ասում է նա, ու շարունակում խոսել դավաճանների մասին. Հասարակությանը դաստիարակելու համար կարևոր է նաև դավաճաններին հասարակական պարսավանքի արժանացնել։

«Փոխարեն հասարակական պարսավանքի ենթարկեք, ասում եք՝ դավաճանները պուպուշ են, դավաճաններին թաքուն պահենք, ո՛չ, պետք է հանրայնացնել և դա արմատախիլ անել մեր հասարակությունից, բանակում դավաճանները չեն կարող տեղ ունենալ։ «5-րդ շարասյունը» ԶՈւ-ում անելիք չունի, ԶՈւ անելիքը ՀՀ սուվերեն տարածքը և մեր անվտանգությունը պաշտպանելն է, ուրիշ անելիք, այդ թվում՝ նաև քաղաքական անելիք բանակը չունի»,- ԱԺ «Հայաստան»խմբակցության պատգամավոր Աննա Գրիգորյանին նախատում է պաշտպանության նախարարը։

Պապիկյանը խոստովանում է՝ բանակում հսկայական անելիք կա, առաջնագծում պայմաններն իդեալական չեն, իսկ սեպտեմբերյան դեպքերից հետո նոր առաջնագիծն ամբողջական կահավորման կարիք ունի, խոսքը վերաբերում է նաև թիկունքային որոշակի ենթակառուցվածքներին։ Այս ամենը խոստանում է բարեհաջող ավարտին հասցնել Պապիկյանը, բայց ահա իր նախորդի՝ Վաղարշակ Հարությունյանի ստորագրած փաստաթղթի մասին, որով հայկական բեռնատար մեքենաները պետք է անխափան երթևեկություն իրականացնեին Գորիս-Կապան և Կապան-Ճակատեն ճանապարհով, որն այս պահին չի իրականացվում, հրաժարվում է որևէ բան ասել։

Աղբյուր` Փաստինֆո