Փաստ ինֆո

Իրավիճակն Արցախում բավականին լուրջ է՝ նամանավանդ, եթե հաշվի ենք առնում այն, որ Կաշենի, Դրմբոնի ուղղությամբ, Շուշիի հատվածում հակառակորդն ուժեր է կուտակել։ Սա վկայում է այն մասին, որ Արցախի վրա ճնշումները սաստկանում են։ Հիմա մեր կարևորագույն խնդիրը հասարակության կոսնոլիդացիան է, ինչը և փորձում ենք անել։ Այդ մասին «Փաստինֆո»-ի հետ զրույցում ասաց «Վերնատուն» երիտասարդական վերլուծական կենտրոնի ղեկավար, «Արդարություն» կուսակցության երիտթևի ղեկավար Արշակ Աբրահամյանը։

«Շատ դժվար է ինչ-որ բան կանխատեսել, իրավիճակն արագ է փոփոխվում։ Դեռ չհասցրած մի խնդիրը լուծել, նորերն են ի հայտ գալիս։ Արցախի վրա ճնշումներն էլ ավելանում են ու, ցավոք, ՀՀ իշխանությունների կողմից ևս։ Հիմա հանդիպումներ ենք ունենում հասարակության տարբեր խավերի, ՀԿ-ների, երիտասարդական կազմակերպությունների, ներկա ու նախկին պաշտոնյաների հետ, նախանշում մեր անելիքները, այսպես ասած, ճանապարհային քարտեզ ենք փորձում գծել»,-ասաց մեր զրուցակիցը։

Արցախի պաշտպանության գաղափարի շուրջ քաղհասարակության կոնսոլիդացմանը, Արշակ Աբրահամյանի խոսքով, օգնում են տարբեր նախաձեռնություններ, ինչպես օրինակ՝ «Հանուն Արցախի պաշտպանության» շարժումը, Միջխորհրդարանական ընդդիմադիր կուսակցությունների համակարգման մարմինը և այլն։

Քաղաքական, հասարակական գործիչների հետ կլինի հանդիպումը, թե հասարակության ամենատարբեր ներկայացուցիչների, քննարկումները մի քանի կարևոր կոնցեպտների շուրջ են լինում։ Պայքարի միասնական դաշտ պետք է ձևավորենք, որպեսզի կարողանանք պաշտպանել կարմիր գծերը։ Անիմաստ կդառնան Արցախն Ադրբեջանի հետ ինտեգրելու անթույլատրելիութւան մասին բոլոր հայտարարությունները, եթե գործնականում չաշխատենք դա թույլ չտալու համար։ Արցախի ներկա իշխանություններին ևս պարբերաբար հորդորում ենք ձերբազատվել հարմարվողական կեցվածքից և տեղի չտալ ՀՀ իշխանությունների ճնշումներին ևս։ Այն, որ ֆինանսական աջակցության և այլ լծակներ օգտագործելով՝ ՀՀ ներկա իշխանությունն Արցախի իշխանություններին փորձում է հնազանդեցնել, ակնհայտ է։ Բայց մի բան պետք է հստակ գիտակցել. ցուցաբերվող ֆինանսական օգնությունը որևէ կերպ կերպ չի կարելի շահարկել և Արցախին ստրուկի պես վերաբերվել»,-նշեց Աբրահամյանը՝ հավելելով, որ Արցախի իշխանությունները բացառապես ժողովրդի կամքը պետք է արտահայտեն՝ չենթարկվելով ոչ Ադրբեջանից, ոչ էլ ՀՀ իշխանություններից եկող պարտադրանքներին։

Հետզհետե սաստկացող ճնշումներից բացի, արդեն 93 օր շարունակվող շրջափակման պայմաններում Արցախում տնտեսական ու սոցիալական խնդիրներն էլ ավելի են սրվել։ Աբրահամյանն ասում է՝ կյանքի ճանապարհի փակ լինելու հետևանքով հազարավոր մարդիկ կորցրել են իրենց աշխատանքը, մինչդեռ որոշ գործարարներ գերշահույթներ են ստացել ու ստանում, ինչը բացառելու ուղղությամբ ևս բավարար ջանքեր չեն գործադրվում։

Կենսական անհրաժեշտության ապրանքների ձեռքբերման, բանկային քարտերի ժամկետի հետ կապված խնդիրները մի կողմից, անվտանգային՝ օրեցօր սաստկացող մարտահրավերները՝ մյուս, մեր զրուցակցի խոսքով, Արցախում ապրողներին այլ տարբերակ չեն թողնում, քան արագ ինքնակազմակերպվել և ստիպել իշխանություններին՝ դրսևորել քաղաքական կամք, ազգային ու պետական շահին հակասող ցանկացած առաջարկի դեպքում ընդվզել և անարդարությունների դեմ արդյունավետ պայքարելու մեխանիզմ կիրառել։

Աղբյուր` Փաստինֆո