Փաստ ինֆո

Նախկինում էլ առիթ ունեցել եմ ասելու, որ շատ հաճախ մեր հանրային հարթակներում, սոցիալական ցանցերում որպես ահազանգ ներկայացվում է, թե ՀՀ կառավարությունը պատրաստվում է ինչ-որ թուղթ ստորագրել։ Ուզում եմ ձեզ հավաստիացնել, որ եթե մենք ունենանք իրավիճակ, որ մնացել է 1-2-3 օր, որ մենք ինչ-որ թուղթ ենք ստորագրելու, դա իրականում շատ լավ նորություն է և ոչ թե վատ նորություն։ Այս մասին այսօր հրավիրած մամուլի ասուլիսում ասաց ՀՀ վարչապետ Նիկոլ Փաշինյանը՝ պատասխանելով հարցին, թե կա ինչ-որ փաստաթուղթ կամ քննարկումներ, որով ՀՀ իշխանությունները պատրաստվում են կասկածի տակ դնել Արցախի ժողովրդի ինքնորոշման իրավունքը։

«Դա նշանակում է, որ բանակցային գործընթացներում մենք ունեցել ենք առաջաընթաց և հասել ենք արդյունքի, որը մեր երազանքների արդյունքը չէ, բայց որը, այնուամենայնիվ, արդյունք է, որը պետք է ապահովվի երկարաժամկետ խաղաղություն, կայունություն և զարգացում։ Կա՞ արդյոք փաստաթուղթ, դուք գիտեք, որ, այսինքն՝ երևի չգիտեք դեռ, որ 2-3 օր առաջ ստացել ենք Ադրբեջանի արձագանքը մեր նախագծի վերաբերյալ»,- նշեց Փաշինյանը՝ հիշեցնելով, որ դեռևս 2023 թվականի փետրվարի կեսերին հայկական կողմն Ադրբեջանին է փոխանցել խաղաղության պայամանգրի հնարավոր նախագծի վերաբերյալ հերթական արձագանքը։

ՀՀ վարչապետի խոսքով՝ իրականում խաղաղության պայմանագրի մեկ նախագիծ կա. ադրբեջանական կողմի վերջին առաջարկներում թեև Փաշինյանն առաջընթաց տեսնում է, սակայն, ըստ ՀՀ վարչապետի, որքան գործընթացը առաջ է գնում, այնքան ի հայտ են գալիս «ֆունդամենտալ պրոբլեմներ»։ Դրանցից մեկը, ըստ Փաշինյանի այն է, որ որ Ադրբեջանը փորձում է խաղաղության հաստատման և հարաբերությունների հաստատման հնարավոր պայմանագրի միջոցով ՀՀ տարածքային պահանջներ կամ նկրտումներ ձևակերպել, ինչը պաշտոնական Երևանի համար կարմիր գիծ է։

«Հաջորդը մենք տեսնում ենք, որ այդ տեքստի առաջարկներով Ադրբեջանը փորձում է ԼՂ-ում ցեղասպանություն կամ էթնիկ զտումներ իրականացնելու մանդատ ձեռք բերել, այդ թվում՝ ՀՀ ստորագրությամբ։ Դա նույնպես, բնականաբար, կարմիր գիծ է մեզ համար»,- նկատեց գործադիրի ղեկավարը։

Կառավարության ղեկավարի մեկնաբանությամբ՝ թեև Ադրբեջանի առաջարկներում գրված չէ, որ վերջինս ստանձնում է ԼՂ հայությանը ցեղասպանելու մանդատ և թույլտվություն, այդուհանդերձ ինքը այդպիսի ընկալում ունի և անհրաժեշտության դեպքում կարող է հիմնավորել

«Եթե սա ես ասում եմ, նշանակում է՝ համոզված եմ, որ այդ հիմնավորումները կարող եմ բերել։ Հաջորդ խնդիրը հետևյալն է, որ Ադրբեջանը հետապնդում է այնպիսի գիծ, որ, ըստ էության, մենք նույնիսկ ստորագրված պայամանգրի կատարման երաշխիքների համակարգ չունենանք, ինչը նույնպես կարմիր գիծ է մեզ համար։
Ինչո՞ւ, որովհետև մենք այսօր ունենք ստորագրված, հրապարակված փաստաթուղթ, որը չի կատարվում։ Խոսքը 2020 թվականի նոյեմբերի 9-ի եռակողմ հայտարարության մասին է։ Այդ հայտարարության համաձայն որևէ կերպ Լաչինի միջանցքը փակ չպետք է լիներ, իսկ Լաչինի միջանցքը փակ է, հետևաբար՝ սա ավելի ընդգծում է Հայաստանի զգայունությունն այն հարցում, որ որևէ փաստաթուղթ, որը կստորագրվի պետք է ունենա իրականացման երաշխիքներ, ցանկալի է միջազգային երաշխիքներ»,- հավելեց Փաշինյանը։

Մանրամասները՝ տեսանյութում։

Աղբյուր` Փաստինֆո