Փաստ ինֆո

Նիկոլ Փաշինյանը չթաքցրեց՝ ՀՀ-ում «անցանկալի անձ» ճանաչված անձանցից իր նեղացած լինելը և նրանց մուտքը ՀՀ արգելելու հարցի շուրջ կամայականությունը։ Մասնավորապես, հրավիրված մամուլի ասուլիսին լրագրողը հիշեցրեց հայամետ, Արցախամետ գործիչների մուտքը ՀՀ արգելելու փաստը, ապա ընդգծեց, որ մարդիկ կան, որոնք չգիտեն, որ իրենց մուտքն արգելված է ՀՀ, տոմս են գնում, բայց թույլ չեն տալիս մուտք գործել ՀՀ։

«Մյուս կողմից՝ հանրությունը կարող է չիմանալ, թե ում է արգելված, ինչու է արգելված։ Կարելի է ենթադրել, որ նրանցից ամեն մեկը գուցե ՀՀ ներկայիս քաղաքական վերնախավի հետ չի կարողանում հարաբերությունները կարգավորել, դրա համար են արգելում ՀՀ։ Ցուցակ է պետք ունենալ երևի, որտեղ նշված է անունները, յուրաքանչյուրի մասով գրված կլինի, թե ինչու է արգելվում նրա մուտքը ՀՀ։ Փորձեցինք գտնել նման մի ցուցակ, բայց դա ոչ մի կերպ չստացվեց»,- նշեց լրագրողը, ինչին ի պատասխան Փաշինյանը հայտարարեց, որ կան պետական մարմիններ, որոնք լիազորված են կայացնել համապատասխան որոշումներ օրենսդրության հիման վրա։

«Եթե ավելի գլոբալ, ապա ՀՀ-ն ինքնիշխան պետություն է և ՀՀ-ն իրավունք ունի ակնկալելու հարգանք իր նկատմամբ։ Իրավունք ունի ՀՀ-ն նաև իր ինքնիշխան գործիքկազմը կիրառել իր շահերի դեմ ոտնձգությունները կանխելու համար»,- նշեց Փաշինյանը՝ կասկածի տակ դնելով գործիչների հայամետությունը. «Եթե որևէ մեկն ասում է՝ ՀՀ կառավարությունը միջանցք է խոստացել, թող տա, սա ինչ է։ Ի միջիայլոց, հիմա՞ էլ են ասում, որ գիտեն՝ ՀԱՊԿ-ին 4-րդ հոդվածով չեն դիմել, այլ՝ 2-րդ հոդվածի 6-րդ նախադասության 5-րդ բառով։ ՀՀ նկատմամբ այդ մարդիկ պարտավոր են ունենալ հարգանք, այդ թվում՝ ժողովրդի կողմից ընտրված իշխանության նկատմամբ։ Դուք ասում եք՝ որոշ մարդիկ ՀՀ չեն կարող մուտք գործել, ուզում եմ Ձեր ուշադրությունը հրավիրել մի փաստի վրա, որ, եթե այդ մարդիկ ՀՀ-ի նկատմամբ իրենց արածի մի տոկոսն անեին այն երկրների նկատմամբ, որտեղ ապրում են, իրենց տուն չէին կարող մտնել՝ առանց վիզայի»։

Նկատենք, որ «Փաստինֆո»-ն եւս գրավոր հարցում էր ուղարկել ԱԱԾ՝ պարզելու պերսոնա նոն գրատա ճանաչված անձանց ցուցակը կամ գոնե թիվը, սակայն ԱԱԾ-ն մերժել է տեղեկատվության տրամադրումը։
Մանրամասները՝ տեսանյութում։

Աղբյուր` Փաստինֆո